Mawkyrwat, ‘Naitung 07: Ka South West Khasi Hills District Badminton Association ryngkat ka jingiatreilang bad ka ophis u District Sports Officer, South West Khasi Hills District mynta ka sngi ka la plie pyrda ia ka lympung ialehkai badminton kaba la tip kum ka ‘9th South West Khasi Hills District Badminton Championship 2023’ (SWKHDBC) hapoh ka Mawkyrwat Indoor Stadium, South West Khasi Hills District ha kaba u Bah Pius Marweiñ, MLA ka Ranikor Constituency u la long kum u Kongsan.
Kiba la wan iashimbynta ha kane ka jingïalehkai ki don baroh 101 ngut naduh ki hep rit, ki samla, ki rangbah bad kumjuh ruh ki longkmie.
Haba kren kum u Kongsan, u Bah Pius Marweiñ, MLA ka Ranikor Constituency u la pynpaw ka jingaikhublei na ka bynta kane ka association kaba la pynlong ia kum kane ka lympumg ialehkai kaba long kum shibynta ba ki khynnah rit, ki samla bad kiba la heh la san kin ioh ban ia kilanmet khnang ba kin ioh ka met kaba koit ba khiah. Ha kajuh ka por u la ong ruh ba ki jingialehkai ha kine ki sngi kim long shuh tang ki jingpynbyrngia ia ki shimet ne ia ki nongpeit kai hynrei ka la long kawei na ki bynta ban ai kam ai jam na ka bynta kito kiba nang ban pyndonkam hok ia ka sap kaba U Blei U la ai ha ki.
Namarkata, u la ai mynsiem ia ki ‘rang bad ki ‘thei ialehkai ba kim dei ban shu ialehkai tang ban pynlut kai ia ka por, hynrei ki dei ban buh ha ki ia ka thong ban poi sha kiwei pat ki kyrdan kata ban kiew na ka distrik sha ka state bad kumjuh ruh wat ha ka National Level.
Kiwei pat kiba iadonlang ki long ka Kong Y.R. Mawlong, MCS, Additional Deputy Commissioner, South West Khasi Hills District, u Bah R.R. Lyngkhoi, Myntri Shnong Sohkhyllam bad kiwei de ki riew rangbah.
U Bah H.S. Diengdoh, President jong ka South West Khasi Hills District Badminton Association u la pyniaid ia ka jingialang bad ka Kong Nemoralda Nongrum, Treasure jong ka South West Khasi Hills District Badminton Association pat kaba la ai ki ktien khublei.
