Shillong, Jylliew, 01: Ka East Khasi Hills Local Taxi Welfare Association (EKHLTWA) ka la kyntait mardor ban pdiang ïa ka hukum ba la pynmih da ka Deputy Commissioner jong ka East Khasi Hills District ka Kong RM Kurbah kaba la pynjari da ka hukum ïa baroh ki kali kamai ban pynïaid da ki Odd-bad ki Even Number, kiba kamai na Kashari Point ter ter sha Khyndai Lad bad haduh Motphran.
Katkum ka hukum ba la pynmih da ka Deputy Commissioner ha ka sngi Palei, ki kali kamai, ki kynthup ïa ki STPS Bus, ki SSPTS-Maxi Cab bad ki local Taxi rong iong & stem kin sdang ban ïaid da ki Odd bad ki Even Number naduh ka 5 tarik mynta u bnai.
Ha kaba ïadei bad kane, u Organising Secretary jong East Khasi Hills Local Taxi Welfare Association (EKHLTWA) u Bah Edison Suting ha ka jingïakren bad ki lad pathai khubor tang hadien khyndiat kynta ba ka DC ka la pynmih ïa ka hukum u la ong, “Kane ka jingleh jong ka Sorkar ïa ngi kiba kamai ha sor Shillong ka long kumba ngi dei ki mraw namar ba katkum ka jingpynmih ïa ka hukum ka long beit hakdak khlem kano kano ka jingpyntip bad khlem kano kano ka jingkhot ïasyllok lang ïa ngi ki nongñiah kali kamai jong ka East Khasi Hills bad ka long kaei kaei kaba ngim sngewtynnat namar ba phin ong ban khang ïa ngi ki nongñiah phi ladei ban khang shwa ïa ki nongtrei sorkar kiba ñiah kawei ka kali uwei u briew.”
“Ym dei tang ma ngi kiba pyndheng kali ha surok wat ma ki (nongtrei sorkar) ruh ki pyndheng kali,” ong u Bah Suting bad kynnoh ruh ba ki kali jong ki nongtrei Sorkar ruh ki pyndheng kali ha surok namar ba ki pynieng ïa ki kali ha shilynter ka surok IGP bad ha shilynter ka surok ha Treasury, Lachaumiere.
“Lada phi shu peit tang ïa ngi kiba ñiah kali kamai ngim sngew ïahap. Ha ka jingshisha ki la dei ban khang ïa ki kali kiba wan kamai shane. Kine ki kali kamai kiba wan nabar ki lah ban rung sha Khyndai Lad bad sha Motphran. Khang shwa ïa ki kali Assam ka Khyndai Lad kan sa kylluid,” la bynrap u Bah Suting.
“Hynrei mynta la jyllei da ki kali Assam ngim ïoh kamai shuh, ka dei keiñ ba kan pyndheng kali ïa ka sor Shillong. Jin lada ka Sorkar ka peit ïa kita, ngi kiba ñiah kali kamai ngi la lah ban kit hi ïa ki nongjngohkai pyrthei kiba wan nabar bad ka sor Shillong ruh kan kylluid,” u la ong.
Haba kynthoh halor ka jingsiew khajna u Bah Suting u la ong, “ban shu khang hakdak kan pynduhnong ïa ngi katba ïa ka khajna lada slem tang shi sngi ban siew ruh ngi la shah daiñ kuna. Ka long kaei kaei ka bym sngewtynnat.”
U la ïathuh ba ka Association kan sa shong da ka jingïalang ban ïa pyrkhat halor kane ka hukum ba la pynmih da ka Deputy Commisssioner ban shim ïa ka rai shwa ka hukum ba la pynmih da ka Deputy Commissioner kan treikam naduh ka 5 tarik mynta u bnai.
