Khliehriat, Jylliew, 01: Ka kynhun Pulit Anti-Narcotic Task Force jong ka East Jaiñtia Hills District ryngkat ka jingiatreilang bad ki Pulit jong ka Lumshnong Police Station ha ka sngi Palei ki la ïoh kurup ïa u drok Heroin uba don ka jingkhia kaba 926.40 gram na kawei ka kali kaba don ïa u nombar AS-24-D-2838 kaba ka dang wan na ka thaiñ Kalain ban leit sha Guwahati, Assam.
Ki Pulit kiba la pynlong da ka jingpynap shrip ha ka shnong Tongseng hajan ka HP Petrol Pump, ha surokbah National Highway-06 hadien ba ki la ioh jingtip na ki tnat syntiat ki la ioh bat ia katei ka kali ba la ñiah da u Abdul Aziz Barbhuiya , 35 snem ka rta uba sah ha ka shnong Hailakandi, Assam.
Ha ka jingtalasi ïa kane ka kali ha ryngkat ka jingïadon lang jong ki nongsakhi, ki Pulit ki la ïoh kurup 74 tylli ki synduk sabon ba la thep ïa u kynja powdar rong stem bad hadien ba la leh test ïa une u powdar la pynthikna ba u dei u drok Heroin.
Na ka liang jong ki Pulit ki la kurup noh ïa ka kali, ïa u drok bad rah noh ïa utei u briew uba donkti sha thanat.
