Shillong, Risaw 23 : Ka Jaiñtia National Council (JNC) ha ka sngi U Blei ka la dawa ïa ki Myntri Sorkar, kiba long ruh ki MLA jong rilum Jaiñtia ban ïakren na ka bynta ban pan ïa ki song pynroi ym ban ïakren ïa ka lynti Rel.
“Ngi kyntu ïa ki Myntri Sorkar na rilum Jaiñtia ban pynpaw ïa kane ka mat hapoh ka jingïalang Kynhun Myntri, bad ban kren ruh shaphang ka jingbym don ki kam pynroi ha ka East Jaiñtia Hills District naduh ka jingjot rathai jong ka surok, ka jingbym treikam jong ki skul sorkar, ka jingduna ha ki hospital Sorkar, ka jingbym urlong shuh ka jingdawa ban pynïoh ïa ka College Sorkar bad kiwei kiwei ha ka jaka ban ïakren ïa ka ishu lynti Rel,” la ong u President ka JNC u Bah Sambormi Lyngdoh ha u kyrwoh.
Kane ka jingdawa jong ka seng ka long hadien ar sngi ba u Myntri ka Sorkar Jylla u Bah Comingone Ymbon uba long ruh u MLA ka Shangpung Constituency u la pynpaw ba u pdiang ïa ka jingtyrwa jong ka Sorkar ban wanrah ïa ka lynti Rel ha East Jaiñtia Hills District.
Haba pynpaw ïa ka daw na ka Seng ka la pyrshah ban wanrah ïa ka lynti Rel hapoh ka thaiñ, u Bah Lyngdoh u la ong ba ka Jaiñtia Hills District Autonomous Council (JHADC) haduh mynta ka la phiel ban thaw ïa ki aiñ ki ban khanglad ïa ki briew kiba nabar ka jylla kiba leh ïa ki kam khaii pateng hapoh ka thaiñ bad ban pynkupbor ïa ki Dorbar Shnong khnang ban tehlakam ïa ka jingrung kyrthep jong ki mynder ha ki shnong.
U la ong, ha kaba ïadei bad kane, lada ailad ban wanrah ïa ka lynti Rel, khlem artatien ka jingkharoi jong ki briew kiba nabar kiba wan sha rilum Jaiñtia kan nang kiew. Namarkata, ki trai shnong ritpaid ki don ka hok ban pyrshah ïa kum kata ka projek.
“Ngi ngeit skhem da ka jingwan jong kine ki projek lynti Rel kan ktah ruh wat ïa ki shnong ki thaw ha ki nongkyndong, ïa ki khlaw ki btap, ïa ki lum ki wah ba ki paidbah ki ju shahniah kum ka jingim ba manla ka sngi. Ka East Jaiñtia Hills District ka dei kawei na ki District kaba don bun tylli ki karkhana bad da ka jingwan jong ka lynti Rel kan pynmyntoi ïa kine ki karkhana bad ka jingkylli ka long hato ki nongkhaii trai jylla kin ïoh jingmyntoi ne em na kane,” u la ong.
Da kaba pynpaw ba ka Rel kan pynmyntoi tang ïa kiba nabar, u President ka JNC u la ong, “ki nongwan shong thap be-aiñ kin nang jyllei, ka jingïashongkha khleh kan nang jur khamtam sha ki jaka nongkyndong kaba la nang kiew. Ngi ngeit skhem ba kan pynkha ïa ki jingeh bad ngi dang kwah ban pynneh pynsah ïa la ka riti ka dustur bad ïa ka thymmei. Kaei ka ban jia ïa ki pateng ki ban sa wan.”
Haba pynpaw ba ka district ka donkam eh nyngkong ïa ki kam pynroi ym ïa ka lynti Rel, u Bah Lyngdoh u la ong, “ka JNC ka kwah ban buh jingkylli lada ka Sorkar ka don pisa da ki klur ban wanrah ïa ka lynti Rel hynrei balei pat ka Sorkar kam lah ban wanrah ïa ka College? Ar tylli ki Residential School hapoh ka district la shu ieh lyngkrang hato phi pyrkhat kumno.”
U la maham ruh ba ka JNC ka la pynkhreh ban shim da ka sienjam ba tyngeh lada ka Sorkar Jylla kam sangeh noh ban phohsniew ïa ka lynti Rel ban pynpoi sha East Jaiñtia Hills.
