Shillong, Naitung, 05: Ki nongialam jong ka Hill Farmer Union (HFU) Pynursla Block ha ka sngi Balang ka la leit ban iakynduh ia ka Myntri ka Rep ka Riang ka Dr. Ampareen Lyngdoh ban pynsngew halor ka jinghiar dor jong ki marrep bad ka jingkiewdor jong ki marbam mardih kaba la ktah haduh katta katta ia ki nongrep.
Ha ka jingiakren bad u President jong ka seng, u Bah Vishal Khongshei u la iathuh ba ka jinghiar dor jong ki mar rep kum u synsar, ki soh bad ki jhur ka la ktah shikatdei eh ia ki nongrep. Ha kajuh ka por ruh ki la kyntu ruh ia ka Sorkar ban pynbha ia ka iew kaba don ha khappud khnang ba ki nongrep na ka thain Pynursla kin iohlad ban pyniaid iew ia ki mar rep ki jong ki.
U la iathuh ruh ba na ka liang jong ka Myntri ka la kular ban shimkhia ia ki mat ba ka seng ka la pynsngew ha kaba ka Myntri ka la buh sngi ha ka 10 tarik u Naitung, 2023 yn sa iathir iatai sani halor kane ka mat.
Katkum ka dorkhas ba ka seng ka la aiti sha ka Myntri ka la kyrpad ia ka tnat ka Rep ka Riang ban pynkhie im biang ia ka rep Sohniamtra ha ka thain Riwar, ban buh ia ki karkhana thaw jingbam (Food Processing Industry) na ki jait soh bapher bapher kiba mih na ka thain Riwar kum u Soh Phan, Soh Trun bad kiwei kiwei, ban iarap pynsngew lem sha ka Sorkar ia ki jingeh jong ki nongrep synsar namar ka jinghiar dor shaba palat haba ianujor bad kiwei pat ki snem ba la leit noh, ban iarap ia ki nongrep ban pyniaid iew ia ki mar rep kiba don ha khappud da kaba shna ia ki iew kumba ka long ha ki por ba mynshwa.
