Shillong, Naitung, 05: Ka jingap khmihlynti kaba la slem jong ki nonghikai skul SSA ban ioh ia ka tulop Arrear ka la wan urlong ha kane ka kynti hadien ba u Myntri ka tnat Pule Puthi jong ka Sorkar Jylla u Rakkam A. Sangma u la pyntip sha ka Meghalaya SSA School Association ba ka tnat Pla Tyngka jong ka Sorkar Jylla ka la pyllait ia ka tulop Arrear kaba T.12.44 klur antad kaba dei ka First Installment na ka bynta ka Financial Year jong u snem 2016-2017.
Ha u kyrwoh ba la phah sha ki lad pathai khubor lyngba ka Video, u President jong ka Meghalaya SSA School Association u Bah Aristotle Rymbai u la iathuh ba ha ka 3 tarik u Naitung, 2023 ka Sorkar Jylla la phah ia ka Sanction Order sha baroh ki District da kaba bthah ba kin phah ia ka pisa sha ki Personal Account jong ki nonghikai SSA.
Shuh shuh u la iathuh, ha kaba iadei bad ka tulop, u Myntri ka tnat Pule Puthi u la pyntip ba ka tnat Pule Puthi jong ka Sorkar Jylla kan sa pyllait ia ka pisa tang na ka bynta u bnai Iaiong bad u bnai Jymmang, 2023 ha ka taiew ban sa wan katba ha kaba iadei bad ka tulop kaba sah jong u bnai Jylliew yn sa pyllait kham hadien.
