Shillong, K’lyngkot 22: Ka BJP Meghalaya State Unit ka la buh jingkylli halor ka jingbym pynrung ia ka ktien Jaintia ha ka jingrwai Meghalaya Anthem jong ka Jylla, ia kaba la pyllait dang shen kum ka jingrakhe ia ka jingdap 52 snem ka jingioh jylla bapura jong ka Meghalaya.
“Kito kiba la iohsngew ia ka jingrwai ne pule ia ki ktien jingrwai kin tip ba ka ktien Jaintia kam don, katba la pynrung tang ia ka ktien Khasi bad Garo kynthup ruh ia ka ktien Phareng,” ong u Nongaiktien jong ka BJP Meghalaya Pradesh u Bah M. Kharkrang.
“Ka long kaba donkam ban tip, ba ha ka jingialang Kynhun Myntri kaba la bishar bniah shwa ban shim ia ka rai khatduh ban mynjur ia ki kyntien, u MLA ka BJP uba long u Myntri hapoh ka Sorkar Meghalaya u Bah AL Hek u la pynpaw ia ka jingsngew jong u ba ym dei satia ban pyllait paidbah ia ka State Anthem khlem da pynrung lem ia ka ktien Jaiñtia bad ba ki nongshna ki dei ban thoh biang sa shisien ia ka jingrwai. Hynrei, wat hapdeng ka jingpyrshah bad ka jingai jingmut jong u, la kyntait da kiwei pat ki dkhot kiba don hapoh ka jingialang,” la kynnoh ka BJP.
U Bah Mariahom Kharkrang u la ong, “ka long shisha kaba sngewsih ba ka ktien bakongsan tam ha ka jylla la iehnoh sharud. Ngi lah ban tip la ka jingbym pynrung (ia ka ktien Jaintia) ka dei kaba la leh khnang ne ka dei kaba shu jia ryngkhat, kaei kaba ngi tip, ka long ba ia ki kyntien dei ban bynrap lang da kaba pyndonkam ia ka ktien Jaintia.”“Ngi dawa ban pynbeit noh mardor khnang ba ki lai tylli ki jaidbynriew ki dei ban ioh mihkhmat bad ban ym pynsngewsih iano iano ruh. Ki jaidbynriew Khasi, Jaintia bad Garo ki la iatylli lang kawei ban pynkha ia kane ka jylla-ngi don ia ka pakit ki mynnor kaba ngi la im lang, ka jingiatyllli ban iakhun bad ka jingiaid lynti lang ka dei ban paw ha ka jingmihkhmat ia ka jylla Meghalaya,” la bynrap u kyrwoh.
