Shillong, Jyliew, 01: Ki shipai Border Security Force (BSF) jong ka 4th Battalion, Meghalaya kiba ap pahara ha Border Out Post Pyrdiwah ki la ioh ban kurup ia ki jaiñ Saree kiba shongdor T.13 lak ia kiba la thmu ban shalan be-aiñ sha ka ri Baladesh lyngba ka khappud jong ka East Khasi Hills District.
Ki shipai BSF ki la ioh kurup ia kine ki mar khaïi tuh katba ki snar nongkhaïi ki dang pyrshang ban jam sha shiliang jong u pud u sam ka ri Bangladesh.
Ki snar nongkhaïi tang shu iohi ia ki shipai BSF ki la phet krad lailum laiwah bad iehnoh shadien ia ki mar da kaba shim kabu ia ka jingrben jong ka khlaw.
Ha ka jingtalasi, ki shipai BSF ki la ioh ban kurup haduh phra song ki jaiñ na kane ka jaka. Ia kine ki mar khaïi ruh la aiti noh sha ka tnat Custom ban leh ia kaba donkam.
