Shillong, Jymmang, 31: Ka Hynñiewtrep Border Dispute Redressal Forum (HBDRF) ha ka sngi Balang ka la ujor sha u Chief Secretary ka Jylla u Bah Donald P. Wahlang halor ka jingpakhang lynti jong ki Karbi ia ki Khasi-Pnar kiba sah ha ki shnong kiba hap hapoh ka thaiñ Block-I.
Katkum ka jingiathuh jong u Chairman ka Forum u Bah Chandame Sungoh ba ki Karbi ki la pakhang ia ka surok ha ka shnong Myn-i Umpawiang, kaba hap hapoh ka thaiñ Khanduli bad ha ka thaiñ Mukroh kaba mih sha Mookoilum Tibin bad Inghinlanso.
“Kane ka jingpakhang ki Karbi ia ka surok ka long ban pynsyrtok ia ki Khasi haduh ba kin pyndem hakhmat jong ki,” ong u Chairman ka Forum ha ka jingiakren bad u nongthoh khubor.
“La shah tang ia ki shnong kiba hap hapoh Assam ba la sah da ki Khasi ban leit sha ki jaka iew, hynrei ki paidbah ka jylla Assam bad ki nongshong iew ha Assam kim ju thied shuh ia ki mar rep na ki Khasi. Ki mar rep ba ki Khasi ki ju pynmih ki long kum ki jhur, ki syiar, ki sniang, u khaw bad kiwei kiwei. Kane ka jingkyntait jong ki briew na Assam ban thied ia ki mar rep ka la buh jingeh ia ka ioh ka kot jong ki Khasi ha kaba ki iakynduh mawsiang wat tang ban thied ia ki marbam ban pyndap ia ki jingdonkam ba manla ka sngi ia ka ing ka sem. Nalor kata, ki Khasi ki iakynduh jingeh haba leit wad jingsumar sha Hospital kiba don ha Assam na ka daw ka jingbym iasngewthuh ha ka ktien ka thylliej,” la ong u Bah Sungoh.
Ha ka dorkhas ba la phah sha u Chief Secretary ka Jylla, ka Forum ka la pyntip ia ki jingjia ha kaba ki Karbi ki la wiang ding ia ki iing trep bad hadien kata la ring video bad pynsaphriang ia ki video da kaba tei pop kylla ia ki shnong Khasi da ka jingthmu ban pynjah burom ia ki Khasi kiba sah ha Block-I.
U la iathuh ba ka la don ka jingiakynduh hapdeng ki Deputy Commissioner bad Superintendent of Police jong ka West Karbi Anglong bad ka West Jaiñtia Hills District hynrei kane ka jingialang kam shym la lah satia ban weng ia ki jingeh.
“Ka jingialang kaba la long ha ka 23 tarik mynta u bnai kam shym la lah ban shim ia ka rai namarba ki shnong jong ka Khanduli ki dang ap ia ka shithi na ka Karbi Anglong Autonomous Council (KAAC) ban pynpra noh ia ka khyrdop khrong khajna (Entry Tax Gate) ha Khanduli,” la iathuh u Bah Sungoh.
Une u nongialam jong ka Forum u la pynpaw haba don kano kano ka sienjam ban iapynbeit ia kane ka jingiakynad kaba la neh da ki snem, ki Karbi ki ju mlien ban pynmih ia ki jingkulmar.
“Ha u snem 1970-1971 bad 2002-2003 ka la don ka jingpyrshang ban iakren pynbeit noh ia ka jingiakajia pud, hynrei ki shnong Karbi ki la pynthud kat haduh ba ki nongshong shnong Khasi ki la hap ban phet sha ka shnong Barato,”la iathuh u Bah Sungoh.
Ka Forum ka la kyntu ia u Chief Secretary ban tuklar mardor halor kane kam bad ban phah pynphai biang ia ka Block-I sha ka Jylla Meghalaya.
