Shillong, Rymphang, 23: Ki shipai BSF ha ka jingïatreilang bad ki pulit ka jylla ha ka 22 tarik mynta u bnai, 2024, ki la ïoh ban kurup ïa shibun ka shini bad u kwai ba la shongdor kumba T.20 lak. Ïa kitei ki tiar ba la kurup la thmu ban khaïi beaiñ sha Ri Bangladesh napoh ka khappud kaba don ha South Garo Hills.
Hadien ka jingïoh jingtip kaba thikna ki shipai jong ka 200 Battalion ki BSF Meghalaya, ha ka jingleit khynra lang bad ki pulit ka jylla ki la kurup ïa katei ka shini bad u kwai ba la dep thad tyrkhong. Ïa ka shini bad u kwai la lap napoh kawei ka Ïing kaba la shu ieh shrah kaba don ha khappud kaba hajan ka shnong Rongra kaba ha thaiñ South Garo Hills.
Ïa kitei ki tiar ba la ïoh kurup la aiti noh sha ka thanat pulit jong ka PS – Rongra ban leh ïa ki kam katkum ka aiñ.
