Shillong, Jylliew, 23: Ka Hynñiewtrep Integrated Territorial Organisastion (HITO) ha ka sngi thohdieng ka la aiti da ka dorkhas ha u Assistant Director jong ka tnat Programme Implementation & Evaluation, 3rd Secretariat Nokrek Building, Lower Lachaumiere, Shillong ban dawa ba dei ban pynsangeh mardor ka jingthungkam Peon ia kawei ka thei Garo kaba la tip kyrteng kum ka Jenny. G. Momin halor ka nongrim ba kane ka jingthungkam ka dei kaba shu leh be-aiñ khlem da pynbna paidbah ia ka jinglait thylli jong ka kam bad ruh ka jingiaid lait ia ki kyndon thungkam.
Ha ka jingiakren bad ki lad pathai khubor u President jong ka HITO u Bah Donbok Dkhar u la kynnoh ba kane ka jingthmu thungkam ia kane ka thei Garo ka dei lyngba ka jingbthah da ka shithi kaba la thoh da u Myntri ka Sorkar Jylla u Marcuise N. Marak sha u Director jong ka tnat Programme Implementation & Evaluation, 3rd Secretariat Nokrek Building, Shillong ha ka 18 tarik, Jymmang, 2023 da ka kdew ia ka nongrim ba kane ka thei Garo ka dei kaba wan na ka longing kaba duk bad kaba dei tang ma ka, kaba kit lyngkor ia ka ing ka sem baroh kawei hadien ba ka jingkhladnoh jong ka kmie ha u snem 2021.
Ha kaba iadei bad kane, ka seng ka la dawa ia kane ka tnat treikam ba kam dei satia ban thungkam ia ka Jenny G. Momin ha ka kam Peon hynrei kane ka tnat ka dei ban iaid katkum ki kyndon thungkam.
U Bah Donbok Dkhar u la byrngem ruh lada kane ka tnat treikam jong ka Sorkar kam sngap ia kane ka jingdawa, ka seng kam banse ban leit ujor sha Iingbishar Meghalaya High Court.
“Ngim don jingwit eiei ia ka nongaplai kam hynrei ka ladei ban iaid da ka lynti kaba dei. Ban shu leh sopsop tang namarba ki don jingithuh ngim sngew iahap satia,” la ong u Bah Donbok Dkhar.
“Ha ka shithi ba la thoh da u Marcuise N. Marak la pynpaw ba (ka Jenny G. Momin) ka wan na ka longing kaba duk, hynrei, ym tang ma ka, da ki hajar ngut ki longing kiba duk. Lada aikam ia kane kawei, ia kiwei ruh dei ban ai lang kumjuh,” ula ong.
U la iathuh ba ka seng ka la dawa ba dei ban pynbna ia ka jinglait kam da kaba khot Advertisement bad ban pynlong ruh da ka eksamin thungkam katkum ka lynti jong ka aiñ.
Haba kynthoh ia u Marcuise N. Marak uba pyndonkam bakla ia ka iktiar kum u Myntri Sorkar, u Bah Donbok Dkhar u la ong, “kane ka jingleh ka dei kaba long be-aiñ bad ngi kwah ban pan jingpynshai na ka Sorkar ba balei une u Myntri Sorkar u leh donbor kumne wat haba u Myntri Rangbah u Conrad Kongkal Sangma u ladep ong ba ka thungkam thungjam ka dei ban long kaba khuid ba suba hynrei balei ka dang jia sa kumne.”
“Ngin sa peitkai ia ka National Peoples Youth Front (NPYF) kaba dei ka shnat treikam ki Samla jong ka National Peoples Party (NPP) la ka nud neem ban kynthoh pyrshah ia u Myntri Sorkar lajong lane ia ki MLA jong ki halor kine kam leh sop sop,” la kynthoh u Bah Donbok Dkhar.
“Ngin pyrshah beit ia ka bamsap bad ai ba uba dei hok ban ioh u dei ban ioh,” u la bynrap.
