Mairang, Naitung 10 : Kum shibynta jong ka jingrakhe ia ka sngi kyrpang jong ki nongri dohkha kaba la tip kum ka National Fish Farmers Day, ka tnat Fisheries jong ka Sorkar Pdeng, ka la pynlong ia ka Virtual prokram mynta ka sngi na ka bynta ki jylla bapher bapher jong ka Ri India ha kaba lah ioh ban plie da u Myntri ka Sorkar Pdeng jong ka tnat Fisheries, Animal Husbandry bad Dairying kata U Parshottam Rupala ia ki projek kiba pher ba pher kiba iadei bad ka kam ri dohkha.
Ha kane ka prokram, ha Mairang la ioh ban plie ia kawei na ki Fish Processing Unit jong ka seng treilang Y. Kharsyntiew SHG ha Umwiehsup, Mairang ia kaba la bei pisa na ka skhim Pradhan Mantri Matsya Sampada Yojana (PMMSY) na ka bynta u snem 2021-2022 bad ia kaba la pyn treikam da ka ophis jong u Superintendent of Fisheries, West Khasi Hills District, Nongstoin,
Ha ka prokram ha Mairang, la sakhi ia ka jingiashimbynta jong u Superintendent of Fisheries ka West Khasi Hills District, Nongstoin, u Bah A. Laloo, kiwei kiwei pat ki nongtrei ka tnat Fishery, u Syiem Khynnah jong ka Hima Nongkhlaw, u Paiem K. M Syiemlieh, ki nongialam shnong lem bad ki paidbah ka thain.
Ha kane ka Fish Processing Unit, lyngba ki kor ki bor katkum kane ka juk kaba mynta, yn lah ban pynmih tungtap ia kiba yn pyniaid ha ki iew ki hat bapher bapher ha ka jylla hi baroh kawei.
Ka jingplie ia kane ka shlem pynmih tungtap ka long shibynta na ka jingpyrshang jong ka sorkar ban kyntiew shuhshuh ia ka ioh ka kot jong ki nongshong shnong kiba ia don bynta bad ka kam ri bad die dohkha ne kino kino ki marbam ba lah ban pynmih na ka dohkha bad la kyrmen ruh ba kiba kum kine ki jait skhim kin iarap shuh shuh ban ai kam ai jam ia ki nongshong shnong kiba don ia ka bynta kaba khraw ban kyntiew ia ka ioh ka kot jong ka ri bad ka jylla.
Kiwei kiwei pat ki bynta jong katei ka prokram ki kynthup ia ka jingkren lyngkot na i nongiohbhah na katei ka skhim, kata, i Kong B. Kharsyntiew, iba dei i President jong ka Y. Kharsyntiew SHG bad ka jingpyni nam ia ki tiar ki tar kiba pyndonkam ha ka ban pynmih tungtap.
