Shillong, Jylliew 19 : U MDC jong ka Indian National Congress na Mylliem Constituency u Bah Ronnie V. Lyngdoh u la ong ba ka jingai jingkyrshan jong ka Indian National Congress ia ka National Peoples Party ban ialam ia ka Executive Committee kaba thymmai ha Khasi Hills Autonomous District Council ka long ban pyllait na ka jingpynjari da ka jingsynshar u Lat hapoh ka Council.
Ha ka jingiakren bad ki lad pathai khubor ha ka Lah Sngi u Blei, u Bah Ronnie u la kynthoh pyrshah ruh ia u Chief Executive Member ba la shah pynhiar shuki jong ka Khasi Hills Autonomous District Council u Bah Titostarwell Chyne da kaba ong ba ka jingkren jong u ka long khyllung.
U la pynksan ruh ba ka jingiatreilang hapdeng ka INC bad ka NPP ka dei kaba la shim rai hi da ka Party ym tang ma u marwei shimet.
“Ngi pyrkhat ia ka Council, lada ngim ai jingkyrshan ia ka NPP kan wan ka jingsynshar u Lat. Kan kham bha ba ngi ai jingkyrshan ban lait na ka jingsynshar jong u Lat,” u la ong.
“Lada jia ba kan wan ka jingsynshar u Lat bad mynta kan wan sa ka jingpynbeit thymmai ia ka Khyrnit Bahynriew, baroh khoit ki don hakhmat, lada ngim don bynta ha ka jingpynbeit thymmai, ioh ba ki wanrah ha Parliament ia ka Amendment, lada ka wan ka jingsynshar u Lat mano ban peit ia ka bha ka miat jong ka khyndew ka shyiap, ka riti ka dustur, hato kan ym ktah? Dei halor kata ka nongrim ba ngi shim ia ka rai ban ai jingkyrshan lada ki wanrah ia ka jingpynbeit thymmai hapoh ka Parliament ia ka Khyrnit Bahynriew ngin iadon bynta ban ai jingmut bad ia kiba iahap ngin kyrshan bad ia ki bym iahap ngin pyrshah,” la pynshai u Bah Ronnie.
Ha kaba iadei bad ka jingbate shuki, u Bah Ronnie u la ong, “ngi ieh ha u CEM, namarba ma ki (NPP) ki don 12 ngut bad ma ngi (Congress) ngi don 6 ngut. Ka shong ka jingstad jong u CEM. Lada ngi don ne ngim don hapoh ka EC ruh ngin peit ba ka District Council bad khamtam eh ia ka jingkordor bad ka jingkongsan jong ka Khyrnit Bahynriew.”
