Shillong Jylliew 19 : Ha ka sngi ba u shah pynkhyllem noh na ka shuki Chief Executive Member (CEM) ha Khasi Hills Autonomous District Council ( KHADC) u Bah Titos W. Chyne u la takrain tyngeh ia ki para MDC kiba shet kylla ia u. “Lada para nongmihkhmat dang ia shet kylla sa ia u paidbah lei katno tam, katno sien phin shet kylla ia ki, hangne tang hapoh 30 ngut dang ia shet kylla sa ia u paidbah lei katno sien phin shet kylla” ong u Bah Titos ha ka jingkren jong u hapoh iing Dorbar.
U la kren siat ruh ia ki paralok kiba ha syndah jong u kiba la shet kylla ia u bad u shim ba kane ka jingleh jong ki ka long kumba ki doh nakhmat ki dung pat nadien. “ Ki paralok kiba nga ieid tam, kiba nga la theh lut mynta ki dung ia nga nadien. Nga duwai ba u Blei un pynkylla ia ka dohnud jong ki paralok ki bym don shuh ia ka jingiatip lem, ka jingiatiplem jong ki ka la iap mynta ka sngi hangne, nga u briew ngam lah ban leh eiei hynrei nga la pyndep la ka kamram” bynrap biang u bah Titos.
U la kyntu ruh ia u CEM u ban sa shimti thymmai ba un shim ia kane ka jingshah shet kum ka jinghikai bad ba un long uba husiar namarba kita kiba doh ki lah ban dei ki ban dung nadien. “Wat shaniah iano iano ruh, kin sa dung ia phi nadien” kyntu u bah Titos ia u CEM ba thymmai u ban sa shimti, u la ong ba uta u CEM ba thymmai ruh u dei u paralok ba ia jan jong u (khlem da pynmih kyrteng).
Halor ka jingkylla ha ka sainpyrthei, u Bah Titos u la pynpaw ka jingsngewlyngngoh ba u MDC na Mylliem uba dei u nongialam ka Liang Pyrshah ha ÏING Dorbar Thaw-ain ka Jylla uba pyrshah ia ka NPP hynrei ha KHADC pat u ai ka jingiatreilang bad ka NPP. Ha katei ka por u MDC ka Mylliem u Bah Ronnie V Lyngdoh u la ieng joit naba shong bad u la ong ba kata ka jingkren jong u Bah Titos ka dei ka jingkynthah shimet ia u.
Hynrei u Bah Titos u la pynphai nia da kaba ong ba ka dei ka jingshisha kaba ym lah ban buhrieh hynrei u la pynkut noh ia ka jingkren halor kane ka mat da kaba ong , “Nga khlem mut ban pynmong ia phi hynrei nga shu kren ia ka jingshisha khnang ba u paidbah un tip ka mut aiu kane ka politik hangne”, pynkut u Bah Titos.
