Shillong, Jylliew, 19 : Arngut ki briew kiba shong ha kawei ka thuk thuk ar shaka ki la mynsaw jur katba uwei pat u la khladnoh hashen ha ka jingiatakhuh ki thuk thuk ha jingkieng Chimesengre. Kane ka la jia ha ka lah sngi u blei ha ka por kumba 1:00 baje nohphai sngi.
Katkum u kyrwoh na ki Pulit, la iathuh ba kawei ka thuk thuk Pulsar Bike kaba don ia u nombar AS02-G-0343 ba la ñiah da u Jahangir (25snem) uba sah ha Uttar Samarali, South Salmara, Assam bad uba shong lang hadien ia uba la tip kyrteng kum u Minarul Islam (26snem) Sukchar District, Dhubri Assam ki dang thmu ban leit sha Garobadha. Ha kane ka por, kawei ka thuk thuk kaba don ia u nombar ML14-8862 ba la ñiah da u Dechrang T. Sangma (23snem) uba sah ha Damalgre uba dang wan na Garobadha u la iatakhuh bad ka thuk thuk ba la shong da kitei ki arngut ynda poi ha jingkieng Chimesenggre.
Ha kane ka jingjia, ki arngut ki la mynsaw jur. Ki nongtrei ka EMRI-108 kiba la wan poi ban ai jingiarap, ki la pyntip ba u Dechrang T Sangma u la khladnoh hashen.
Ia ki arngut kiba la mynsaw jur la pynkit noh mar mar sha Tura CHC ban ioh jingsumar, katba ia ka met jong u Dechrang T. Sangma la pynkit noh sha ka jaka buh metiap ha Ampati DM&HO.
