Shillong, Jylliew, 20: U Bah Pyniaid Sing Syiem uba la shah jied thymmai kum u Chief Executive Member jong ka Khasi Hills Autonomous District Council ha ka sngi baar u la kren lyngba ka telephone ia u Chief Executive Member (CEM) jong ka Karbi Anglong Autonomous Council (KAAC) u Dr. Kuliram Ronghang ban ym pynwit ia ki paidbah nongshong shnong kiba sah ha khappud kiba hap hapoh ka Raid Nongtung, Hima Khyrim.
Haba ai jingkren hapoh ka Iingdorbar Thawaiñ kum u CEM ba thymmai jong ka Council u Bah Pyniaid u la ong, ka Council kan sa buddien ha kaba iadei bad ka jingdawa ban pynrung noh ia ka Ktien Khasi ha ka Khyrnit Baphra jong ka Riti Synshar ka ri India.
U la ong ruh ba ka Executive Committee kaba thymmai kan sa buddien ha kaba iadei bad ka jingpynrung ia ki kyndon kiba thymmai kiba pyniohnong ia ka District Counicl ha ka jingpynbeit thymmai ia ka Khyrnit Bahynriew kaba dang don mynta hapoh ka Ministry of Home Affair, ka Sorkar India.
“Ngin sa lah ban pynurlong ia kine baroh, dei tang da ka jingiatreilang. Nga kyrmen skhem ba ki dkhot ka Liang Ïatei kin ai ka jingiatreilang khamtam ha ki mat kiba ktah im im peit peit ia ka jaidbynriew jong ngi,” la bynrap u Bah Pyniaid.
Ha kaba iadei bad ka jingeh jong ki paidbah kiba sah ha ki shnong khappud kiba dang hap hapoh u pud u sam jong ka Khasi Hills Autonomous District Council (KHADC) ia kaba la pynsngew da u MDC jong ka Mawhati bad u MDC jong ka Umroi, u Bah Pyniaid u la ong, “ngi la iohi ba ka Sorkar MDA ka la pyndep ia ka jingiapynbeit pud ha ka wat kaba nyngkong bad ka sorkar Assam ban pynbeit ia u pud u sam bad ia ki kynrum kynram bad mynta ka jingiapynbeit pud ka la poi sa sha ka wat kaba ar.”
U la iathuh ba katkum ka jingai jingmut jong u MDC ka Mawhati, shen ka Executive Committee kan sa hiar sha ki shnong khappud kiba don hapoh ka Raid Nongtung ban sngap ia ki jingeh ba ki paidbah ki iakynduh ha khappud khnang ba ka jingiapynbeit pud kan ym long ka jingduhnong ia ki Hima bad ki shnong.
