Shillong, Jylliew, 20: Hadien ba la ioh jingtip halor ka jingiai wan poi jong ki nongtrei bar jylla kiba trei bad ka Kompani Spaika kaba dang pyntrei mynta ia ka surok Nongstoiñ-Rambrai-Kyrshai, ki dkhot jong ka Khasi Student Union West Khasi Hills District, ha kine ki khyndiat sngi ka la pynlong ia ka jingtalasi ia ki kot ki sla jong ki nongbylla kane ka Kompani.
Ha ka jingtalasi, ki dkhot ka KSU ki la lap ba ki don kumba 20 ngut eiei ki nongbylla bar jylla ki bym don ia ki kot ki sla kiba biang bad na ka liang jong ka Seng ka la phah ba kin leit phai noh bad ha kajuh ka por ka seng ka la maham ia ka Kompani ba lada ka warah ia ki nongtrei ka dei ban da pyntikna ban pynbiang shwa ia ki kot ki sla.
Ki dkhot ka KSU ki la kam ruh ba ki don ar ngut ki nongbylla bar jylla kiba la sdang ban mushlia ia ki kynthei Khasi bad na ka liang jong ka Seng ryngkat ka jingiatreilang bad ki nongialam ki la phah weng kam noh ia ki ar ngut ki bar Jylla bad maham tyngeh ia ki nongbylla bar jylla ba ki dei ban trei beit thik tang ia ka kam lajong ym ban wan mushlia ia ki kynthei Khasi.
