Shillong, Naiwieng, 12: Ka Hynñiewtrep Youths’ Council (HYC) CEC kam lah ban shu sngap bad long tang ki nongpeit ïa ka jingbym lah jong ka Sorkar Meghalaya Democratic Alliance (MDA) ba la ïalam da ka National People’s Party (NPP)
ban pynbeit ïa ki jingeh bad jingdawa ba shong nongrim jong ki nongtrei ASHA ha kane ka Jylla.
“Ka seng ka dawa ïa ka Sorkar ba kan thaw ïa ki lad ki lynti ban pynurlong ïa ki jingdawa jong ki ASHA ban ïoh ïa ka jingsiew kaba biang katkum ka kam ba ki trei, ban kynthup ïa ki hapoh ka MHIS na bynta ban ïoh jingsumar ei bad kiwei kiwei ki jingdawa jong ki,” ong u kyrwoh ba la phah da u President ka HYC u Bah Roy Kupar Synrem ha ka sngi U Blei.
“Ngi pynpaw ïa ka jingkyrshan ka bapura ïa ka MAWU halor ka jingïakhih jong ki bad ngim lah ruh khlem da ai khublei bad sngewnguh ïa ki ASHA halor ka jingtrei len lade ka jong ki ha ki jylli treikam kaba ki don khamtam eh ngim dei ban klet kumno ba ki len lade ha ka por ba ngi mad ïa ka Khlam Covid-19, dei ma ki kiba long kita ki nongtur ba hakhmat ban ïakhun pyrshah ïa kane ka khlam. Ki lah ai ka jingshakri ka bapura ïa ki nongshong shnong ha kato ka por bad ha manla ka sngi ha kaba ïadei bad ka koit ka khiah jong ki nongshong shnong hi baroh,” u la bynrap.
“Kumta, kum ki nongshong shnong ruh ngi sngew dap ram ïa ka jingshakri ba len lade ka jong ki bad lyngba kane ka kyrwoh ngi khot ngi wer ïa baroh ki dkhot ka jaidbynriew, ki Dorbar Shnong bad kiwei ba kin kyrshan ïa ki ASHA ha kane ka jingïakhih ka jong ki,” u la ong.
“Ngi kyntu ruh ïa ka Sorkar ba kan pynbeit noh kloi ïa kane ka kam namar lada ki ASHA ki bteng ïa ka jingïakhih, kan ktah pat ïa ki paidbah nongshong shnong ka Jylla. Ngi kyntu ruh ïa ka Sorkar ba kam dei ban pyntieng pynsmiej ïa ki nongtrei ASHA ba kin shah weng kam lada kim sangeh ka jingïakhih namar lada ka Sorkar ka bakla ban shim rai bad weng kam ïa ki ASHA kiba ïakhih ban dawa ïa la ka hok, na ka liang ka seng ruh kam banse ban mih shakhmat bad ïakhih pyrshah ïa ka Sorkar Jylla,” la maham ka HYC.
