Shillong, Jymmang, 23: U District Magistrate ka East Khasi Hills District ha ka sngi Palei u la pynjari da ka Section 144 CrPC ban khang pyrshah ïa ka jingïaid rally hapoh ka East Khasi Hills District ha ka sngi ñiew vote jong ka elekshon Lok Sabha 2024 ha ka 4 tarik, Jylliew. 2024.
“Ban pynneh pynsah ïa ka shongsuk shongsaiñ bad ban tem ïa kino kino ki huri hura ha ka sngi ñiew vote, la mana ban ïaid proseshon bad pyrta slogan hapoh ka jaka ñiew vote tad haduh ba da dep ñiew lut ïa ki vote bad pynbna ïa ka result,” ong u District Magistrate.
Ym shah ban pyndonkam ïa ki tynghun pynsawa bad ban leh kmen da kino kino ki seng saiñpyrthei ne ki kyrtong hapoh ka jaka ñiew vote. La mana ban ym shah ban rah dieng, lathi, tiar siat, ïaid proseshon ne ïalum briew hapoh shi kilomitar na ka jaka ñiew vote
La mana ban thang bom pataka ha surok ne ha ki jaka paidbah ha ka sngi ñiew vote.
“Ym shah ban ïaid rally jingjop da kino kino ki kyrtong ne ki seng saiñpyrthei hadien ka jingpynbna ïa ka result hapoh u pud u sam jong ka East Khasi Hills District. Yn ym shah palat arngut ki briew ban synran ïa u kyrtong ba jop ne ïa u/ka nongmihkhmat ba la ïoh jingbit ban pdiang ïa ka ‘certificate of election’ na u Returning Officer,” la ong u District Magistrate.
Ha ka jaka jong ka Counting Hall, yn shah tang ïa ki briew kiba don ïa ki ID Card/Car Pass ba la ai da u District Election Officer, East Khasi Hills District, ba kin rung shapoh. Ym shah satia ban rah mobile phone ne camera hapoh ka jaka ñiew vote.
Kane ka hukum kan treikam noh mardor tad haduh ka por 4.00 baje janmiet jong ka 6 tarik jylliew.
