Shillong, K’lyngkot, 18: Ka jingai mynsiem bad ka jingkmen ka la paw ha ka Meghalaya Games 2024 haba ka Kong Marbarisha M. Pdah, 44 snem ka rta ka la hap ban pynbit pynbiang ialade ban iakhun ha ka jinglehkai syndah lang bad ka khun kynthei ka samla Toiaibha M. Pdah, 24 snem ka rta bad kine arngut kin iakhun lang ha ka jingiakob siat suloi ha ka Senior Women’s Category ha ka 10meter bad 50 meter Rifle event bad kawei pat kan dei ha ka 10 meter bad 25 meter Pistol event.
Ka jingiaid lynti jong kine arngut ka pyni shai ia ka jingkhlaiñ jong ka iing ka sem ban iaid ryngkat lang na ka bynta ban pynurlong ia ka jingphohsniew ka jong ki. Kane baroh ka la wan urlong hadien ba ka kong Marbarisha ka la sngew ioh mynsiem na ka jingsngewtynnad jong ka khun ban siat pistol bad katba ki shalyntem ka por ki nang tyllun, ka Kong Marbarisha ka ju ialam ia la ka khun ban leit pyntbit ha ka jinghikai siat pistol.
Haba iohi ba ka khun ka la nang kiew ha ka jingialehkai ha ki jingiakhun bapher bapher, ka kong Marbarisha ka la sdang ban mih shakhmat ha ki kam lehkai. “Haba nga iohi ia ka Toiaibha ba ka ieng ha ka nongrim ban poi sha ka thong, kane ka pynskuiñ ia ka mynsiem jong nga bad nga sngewthuh ba kam pat dier ka por ban beh ia ka thong bad ban bud ia ka jingphohsniew,” ong ka Kong Marbarisha, haba kren shuwa ban iakhun ha ka 5th Meghalaya Games.
“Ka Meghalaya Games ka ai ia ngi ia ka kabu ban mih madan lang bad ban wanrah burom ia ka jylla,” ka la bynrap.
Ka samla Toiaibha ka la pynpaw da kaba ong, “Kum ka khynnah skul, nga ju don bynta kum ka NCC cadets bad dei nangne ba nga la sdang ban sngewtynnad ia ka jingiasiat suloi. I mei i ju ai mynsiem ia nga ban leit sha ki NCC camps bad i ju ai mynsiem ruh ba ngan iaid beit shakhmat ha ki jinglehkai siat suloi. Ha u snem 2016, nga ioh ia ka phone call na ka paralok bad ka la wer ia nga ban rung dkhot ha ka Shooting Association. Ka dei ka jingkwah jong i mei ba ngan long ka nonglehkai. I ju synran ia nga da leit lehkai ha Assam Rifles kaba don ha Happy Valley, Shillong. Ha kaba nyngkong, i ju sngew artatien ban rung lang ban lehkai namar ka rta, hynrei i ju synran ia nga sha ki State/National Championship.”
