Shillong, 9 Jylliew 2023 : Ka Ministry of New and Renewable Energy ryngkat ka jingiatrei lang bad ka Meghalaya Non-Conventional & Rural Energy Development Agency (MNREDA) ka la pynlong bun tylli ki rynsan ai jingshai ban rakhe ia ka sngi pynneh mariang. Katei ka rynsan ai jingshai ba la pynlong ha State Convention Centre, Shillong ka long ban ia sam ia ki jingtip kiba kham bniah kiba la iaid shakhmat bad ki nongshong shnong jong ka Meghalaya bad ruh ban pynshlur bad kyntu ban pyndonkam ia ki bor kiba mih na ka mei mariang kiba don ha ka jylla.
Ki riewshemphang na ka Meghalaya Non-Conventional & Rural Energy Development Agency ki la ioh ban ai ka jingpynshai kaba bniah bha halor ki sienjam kiba la iaid shakhmat kumno ban pyndonkam ia ki bording kiba mih na ka mei mariang bad ruh ka jinglah jong ki ban treikam hapoh ka jylla.
Na ka liang ki paidbah ki la ioh ruh ban sakhi ia ki prokram halor ka kolshor na ki nongshim bynta na ka jylla hi bud pat sa ka jingbatai kaba sani bha bad janai bha na I Kong Elizabeth Kharjana, Project Officer MNREDA.
Kum shibynta jong ka jingrakhe, ki samla pule na ki saw tylli ki High School kynthup na Brookside Adventist Higher Secondary School, St. George Higher Secondary School, Laban Assamese Girls Higher Secondary School, bad Bhanu Bhakta Nepali Pro Secondary School, kiba shim bynta ha ka jingiakob dro jingdro halor ka phang “Renewable Energy for a Better Tomorrow.”
Ka jingtbit jong kine ki nongshim bynta ka pyni ia ka jingkhmih lynti jong ki samla pule halor ka jingdonkam ban don ia ka bording kaba khlem lut shuh. Katei ka prokram ka sakhi ruh ia ka jingpyni nam ia ki katto katne ki jait tiar kiba ym pat paw pyrthei, kaba ailad ia ki nongwan ban ioh ia phylliew jingmut khamtam haba iadei bad ka Solar Mission kaba ka sorkar Meghalaya ka wanrah ha kane ka kynti.
Kitei ki jait tiar ki long ruh kum ka nongmuna jong ka jingpynkhreh jong ka sorkar kumno ban wanrah noh da ki bor jong ka mei mariang na ka bynta ban pynmih ia ka bording bad ruh kum ka jingpeitjngai lypa na ka bynta kawei ba kan ym shah ktah shuh.
Ha ka jingialang la iohi ruh ia ki jingpyni nam halor kitei ki bor kiba lah ban ioh na ka mei mariang hapoh ka jingialam jong u Arup Chakraborty Junior Engineer, MNREDA, uba la pyni tiak ia bun ki lad ki lynti kiba lah ban myntoi na ka mariang ha ka jylla.
Hadien kane ka la don ruh ka jingai jingpynshai na bynta ki rangbah shnong kynthup naduh Sunny Hill, Lumdiengtri, Lama Villa, Jaiaw Langsning, Dymmiew, Lumkshaid, Mawprem, Qualapaty, Nongsohphoh, bad Laitumkhrah.
Katei ka prokram ka kham pynleit jingmut ruh halor ka skim PM Kusum scheme bad ka Biogas scheme, u Arup Chakraborty bad u Assistant Director(Planning) ka MNREDA, u Danseng M. Sangma kiba la pyni ia ki jingmyntoi kiba lah ban ioh.
La ioh ruh ia ka jingbatai kaba bniah bha halor ka bording ba tan naka sngi (Solar Energy) ia kaba la pynshai da u Assistant Director (SOLAR) na MNREDA, u Rafikul Islam. Na ka liang ka Ministry jong ka New and Renewable Energy ka sorkar pdeng bad ruh na ka MNREDA ki buh ka thong ban pynioh ia ka bording kaba khlem lut noh ne duh noh bad ruh ban pynshlur ban pyntreikam noh ha ka jylla Meghalaya.
