Shillong, Jylliew, 09: Ka Khasi Jaintia Fish Wholesaler and Retailer Association (KJFWRA) ha ka sngi Thohdieng ka la dawa ia ka Commissioner of Food Safety ka Kong R.M. Kurbah ban ai jingpynshai mynno bad hangno ba ka tnad ka la phah leh Test ban pynshisha ba ki dohkha ba la wanrah na shabar ka jylla ki dei kiba la injek da ka dawai Formalin.
Kane ka jingdawa ka long hadien ba ki nongdie bad ki nongkhaii dohkha ki la iakynduh bad ki lad pathai khubor ha basa die dohkha ha Iewduh tang shisngi hadien ba ka Commissioner of Food Safety, ka la pynjari da ka hukum ban khang ia ka jingdie dohkha haduh 15 sngi hadien ba ka Ophis jong ka Commissioner of Food Safety ka la lap haduh 30 tylli ki dohkha ki dei kiba la test positive na ka jinginjek da ka dawai formalin kaba la ktah ia ka koit ka khiah jong ki paidbah.
Ki nongkhaii bad ki nongdie dohkha ki la kren bynñiaw ruh halor kane ka jingpynmih hukum ryngkat bad ki kyndon ba kito kiba ialeh pyrshah kin ngat ha ka jingpynsajia da kaba shah set phatok haduh 7 snem kynthih ryngkat bad ka jingsiew kuna kaba T. 10 lak.
Ha kaba iadei bad kane, ka seng ki nongdie bad ki nongkhaii dohkha ki la shim ruh ia ka rai ban leit iakynduh ia ka Commissioner of Food Safety khnang ban ioh ia ka jingshai kaba bniah halor kane ka bynta.
U nongialam ka seng u Bah C. Wankhar, u la pynpaw ba ki dohkha kiba wanrah shapoh ka Jylla Meghalaya ki dei kiba wan na kylleng ki kompani na ka jylla Andhra Pradesh bad ia kine ki dohkha la ioh syrnot ruh na ka Sorkar Andhra Pradesh ha kaba la pynshisha ba kim dei satia kiba la injek da ka dawai Formalin.
Namar kane, kane ka Seng bad ki nongdie dohkha kila rai ban leit iakynduh ia ka Commissioner of Food Safety mynta ka sngi ban ioh ia ka jingshai kaba bniah.
