Mairang, Jylliew 21 : Ha kawei naki jingjia kaba sngewsynei 5 ngut ki briew na kajuh ka ing kynthup ia lai ngut ki khun, ka kmie bad u kpa kila Kem pang bad poi sha Hospital tang namar ba ki la kum bam ia u tit uba kim ithuh.
Kane ka la jia mynta ka sngi ka 21 tarik u Jylliew 2023 haka shnong Wahliewlong, ka shnong kaba hap ha Mawthadraishan Constituency bad katkum ka jingiathuh u Admitstar Marwein u kpa jong ki lai ngut ki khun uba la kem pang naka jingbam tit u la ong ba ka kurim jong u ka Kong Delphina Pariong kala leit kheit ia u tit hynnin ka sngi ka 20 tarik u Jylliew 2023 bad kala shet pat hynne mynstep. U Bah Marwein ula iathuh ba hadien ba kila dep bam ia une u tit ba la shetlang bad u phan kila sdang ban Suh, Prie bad kieng ka khlieh bad kumta la rah noh ia ki baroh san ngut sha Pariong PHC ban ioh ia ka jingsumar hynrei kham hadien la pynkynriah noh ia ki sha Tirot Sing Memorial Civil Hospital, Sangshong, Mairang ban ioh ia ka jingsumar kaba kham paka.
U Bah Marwein u la iathuh ruh ba kaba la pynlong ia ka kurim jong u ban shet ia une u tit bym ithuh kadei hadien ba kala dep ban bam im shwa ia u bad namar ba um don jingktah eiei kala shet jyntah hynrei khlem poi pyrkhat pat ba kin kem pang bad ula iathuh ba mynta ba kila don ha ka jaka ai jingsumar ma u bad 3 ngut ki khun kila iohbor katba ka kurim jong u ka dang tlot.
