Shillong, Jylliew, 21: Ka Indian National Congress (INC) ka la kam ba ka jingkhyllem jogn ka Executive Committee ba la ialam da ka United Democratic Party (UDP) ha Khasi Hills Autonomous District Council (KHADC) ka dei ka jingiashrut hi hapdeng National People’s Party (NPP) bad ka United Democratic Party (UDP).
U President jong ka Meghalaya Pradesh Congress Committee (MPCC) u Bah Vincent H. Pala ha ka jingiakren bad ki lad pathai khubor ha ka sngi balang u la ong ba ka jingai jingkyrshan jong ka seng Congress ia ka NPP ban ialam ia ka Executive Committee kaba thymmai ha Khasi Hills Autonomous District Council (KHADC) ka dei na ka bynta ka jingmyntoi jong ki paidbah khamtam eh ha kaba pynneh pynsah ia ka khyndew ka shyiap, ka riti ka dustur.
Nalorkata, u la ong shuh shuh ba kane ka jingai jingkyrshan ia ka NPP ka dei halor ka nongrim ba ka Sorkar BJP ka la thmu ban wanrah ia ka Amendment Bill jong ka Khyrnit Bahynriew ha Parliament.
“Shwa ban rah ha Parliament donkam ia ka jingai jingmut na ki Autonomous District Council (ADC) bad na ka Sorkar Jylla. Dei na kane ka daw kaba pynlong ia ka Congress ban ai jingkyrshan ia ka NPP khnang ban dup lah ban iada ia ka jingpyntlot bor ia ka Khyrnit Bahynriew,” u la bynrap.
