Shillong, Nohprah, 20: Ka Meghalaya Education Commision ha ka sngi Balang ka la pan jingmut na ka Meghalaya State Olympics Association (MSOA) shaphang ka jingkynthup ia ka jingialehkai Sports ha ka pule puthi na ka bynta jingmyntoi ki khynnah bad ki samla pule.
U Working President jong ka MSOA, Bah John F. Kharshiing, uba la iashim bynta ha ka jingiaphylliew jingmut ba la pynlong da ka State Education Commission ha DERT Annexure Conference Hall, Shillong u la pynpaw ba ka jingthmu ka long ban kyntu ia ka commission ban pyrkhat lang kaei ba kin lah ban leh na ka liang jong ki ban pynshlur ka jingkiew ka Sports lem bad ka pule puthi. Kane ruh ka lah ban pynroi ka jingshim bynta ba bun, naduh ki khynnah ba dang 6 snem shaneng haduh kiba heh.
U Bah Kharshiing u la pyni da ka Presentation kaba la ai kyrteng, “Education and Sports: A Balanced Approach” bad kren ruh shaphang ka jingdonkam jong ka Sports ban tei ia ka met, ka pyrkhat pyrdaiñ bad ki jinglongbriew ba tei ia u briew shimet. U Bah Kharshiing u la banjur ia ka jingdon ka Meghalaya Sports Policy, 2019 bad Meghalaya Youth Policy, 2021.
U Bah Kharshiing, u la ai kopi ia ka Presentation bad ka Meghalaya Sports Policy, 2019 sha ka Chairperson jong ka Commission ka Professor SM Sungoh kaba dei ka Head jong ka Department of Education, North Eastern Hill University ha ka jingdon lang jong ki dkhot ka Commission.
U Working President ka MSOA, u la buh hakhmat ka Education Commission ia ki mat ban pynbiang ki jaka lehkai ba biang bad ban tip la ki skul aiu kiba biang ia ki jaka ialehkai, ka jingshim bynta ban lap ki khynnah don sap ha ka Sports ka jylla, jingthung kam ia ki Coaches ba la biang ka kyrdan jingtip, ka jingdon jong ki ‘physical education Teachers’ na ka bynta baroh ki 15,000 skul ha Meghalaya, ka jingdon ki Sports Specialist & Professionals, ki Sports Psychologist, ki Physiotherapist, ki Masuers, ki Sports Hostels, ki Olympians na ka bynta ka Sports Science center, ka jingdon jong ki sports schools ha manla ki district, ban ai Sports Marks ia ki nonglehkai ba dang pule, ka bhah kam kyrpang na ka bynta kiba jop khusnam, ka jingkiew ha ka song pisa, ka jingpynbeit ia ka Sports University Acts, ka por ba la buh khnang na ka bynta sport ha ki skul, ka Health Checkup ba shisien shiteng snem lyngba ka MHIS ia ki khynnah skul, ka jingpynurlong ki Sports Program, jingwad bniah ia ka rukom leh ki ri Scandinavian kiba la lah ban pynheh pynsan ia ki khynnah ban triem ha ka pyrkhat pyrdain bad ka jingai khusnam lyngba ka YESS Meghalaya na ka bynta ki skul Clubs bad Districts, lyngba YESS Meghalaya program lah ban pynshlur ki jait jinglehkai Sports ba kan khring ia ki khynnah bad ki kmie ki kpa ban shim ia ka Sports kum ka lad kamai ja kpoh.
Ka Prof SM Sungoh, ka la ai khublei ia ka MSOA na ka bynta ka Presentation bad ong ruh ba ki mat ba la iathir iatai ha kane ka sngi kan sa rah sha ka Committee ba dei peit ia kane ka phang bad hadien katan yn sa phah ia ki jingai jingmut sha ka Sorkar Jylla.
