Shillong, K’Lyngkot, 30: Ka Mahila Morcha kaba dei ka seng ki kynthei ka BJP ha ka sngi Baar ki la hiar sha ki District bapher bapher jong ka Jylla ban lum jingkheiñ ïa ki briew kiba ïoh ïa ki jingmyntoi na ki skhim ba la mang da ka Sorkar Pdeng.
Ïa kane ka jinglum jingkheiñ ha ki jylla bapher bapher jong ka thaiñ Shatei Lammihngi kynthup ha kane ka jylla Meghalaya la bthah da ka National President ka BJP Mahila Morcha ka Vanathi Srinivasan.
Ka jingthmu jong kane, ka long ban ïoh ïa ka jingkheiñ kaba bniah haduh katno ki paidbah ki ïoh shisha ïa ki jingmyntoi na ki skhim ba la wanrah da ka Sorkar Pdeng hapoh ka jingïalam jong u Myntri Rangbahduh ka ri u Narendra Modi.
Ka President jong ka State BJP Mahila Morcha ka Kong Susuki Pariat ryngkat ka jingsynran lang jong ka President ka Sikkim BJP Mahila Morcha ka Srijana Thapa Chetri bad ka President jong ka Nagalnd BJP Mahila Morcha ka Shanbeni Yanthan ki la pynlong ïa ki jingïalang bad ki Asha, ki Anaganwadi, ki Self Help Group bad kiwei kiwei ki nongïoh jingmyntoi na ki skhim ka Sorkar Pdeng.
Ha ka jingleit jngoh ïa ka Jowai Civil Hospital, kane ka kynhun ki kynthei jong ka BJP ka la dap da ka jingsngew kmen ban ïohsngew ba ki nongpang ki la pynpaw ïa ka jingsngewnguh ïa u Myntri Rangbahduh ka ri.
Ki nongpang ki la pynpaw ka jingsngewkmen haduh katta katta ba ki ïoh jingmyntoi na ka Ayushman Scheme kaba la long ka jingkyrkhu ïa kito ki longiing ki bym lah ban siew ïa ka bai thiah pang.
Kane ka kynhun ka la leit jngoh ruh ïa ka Wapung Skur Higher Secondary School, ka St. Joseph’s Parish bad ïa ka Cathedral, Shillong.
Ïa mynta, ka kynhun ka la leit rung sha ki bynta bapher bapher ka East Khasi Hills, ka West Khasi Hills, ka East Jaiñtia Hills, ka West Jaiñtia Hills bad ka Garo Hills. Ïa ki jaka ba dang sah jong ka jylla yn sa nang pyndep shuh shuh ha kine ki khyndiat sngi ki ban sa wan.
