Shillong, Rymphang, 21: U Myntri ka Sorkar Pdeng ba khmih ïa ka Health and Family Welfare, u Dr Mansukh Mandaviya da ka ktien u la plie ïa ka “Regional Consultative Workshop on Research Priority for Providing Accessible and Affordable Healthcare for the Northeastern States of India” ha Nongbah Shillong ha ka sngi Balang.
Haba kren ha ka jingïalang u Dr Mandaviya u la ong ba ka Sorkar ka kwah ban pynthikna ba baroh manla uwei pa uwei kin lah ban ïoh ïa ki lad sumar kiba ïa ryngkat khlem kano kano ka jingpynïapher hapdeng uba riewspah bad uba tlot ha ka ïoh ka kot.
Halor ka jingangnud jong ka sorkar pdeng na ka bynta ban kyntiew ïa ka thaiñ shatei lammihngi u Dr Mandaviya u la ong, “ha kine ki 10 snem ba la leit, la don ki jingpyrshang ban wanrah ïa ka sha ka rynsan kaba ïa ryngkatlang hapoh ka ri da kaba pynïasoh ha baroh ki liang la ka dei ha ka ïoh ka kot, ka Koit ka Khiah ki surok, lyngba ka rel, ki I-Ways, ki lad lyngba ka wah bad ki Ropeway nalor kiwei pat. Ha ka sien kaba nyngkong eh ha ka ri la ïohi ïa ka thaiñ shatei lammihngi ba ka la sdang ban ïohi ïa ka roi ka san kum ka engine jong ka ri India. U la ong ba ki lad sumar mynta ki la lah ban don bad ïoh ha kane ka thaiñ baroh kawei.
U Myntri ka sorkar Pdeng u la ïathuh ba palat 31 klur ki briew ki la ïoh ïa ki Ayushman card ban ïoh ki lad sumar ha ki hospital ha kaba ïa ki longïing ki la ïoh ka lad sumar khlem siew eiei haduh T. 5 lak kaba la ai ha ka shisnem, 11,000 ka Jan Aushadhi Kendras ka la plie ha kaba 50-80 percent ka dor kaba tad jong ki dawai kiba la lah ban ïoh, palat 1.64 lak ka Ayushman Arogya Mandirs ki la mih, kiba la kheiñ bad pyrkhat kum ka Health Gate Keeper jong ki nongshong shnong ka India bad ka complete Health Surveillance System bad ka kawei ka jingsdang ka jingsumar kaba la pyntreikam na ki 48 ki BSL Lab”.
Ha kane ka prokram na ka liang u Myntri ka Sorkar Pdeng u la plie ruh ïa ka jaka ïew bad plie ïa ka Master Program on Health Economics and Technology Assessment (MPHETA) ha ka IIPH, Shillong ha ka jingïadonlang Myntri khynnah ka sorkar Pdeng ba khmih ïa ka Health and Family Welfare, ka Dr Bharati Pravin Pawar bad ka Myntri ka Koit ka Khiah ka sorkar jylla ka Kong Ampareen Lyngdoh.
Kham hadien na ka liang ka Myntri Khynnah ka Sorkar Pdeng ba khmih ïa ka Koit ka Khiah ka Dr Bharati Pravin Pawar ha ka por ka jingïasyllok bad ki lad pathai khubor ka la ong ba ka jingïohi jngai jong u Myntri Rangbah duh ka Ri u Narendra Modi, ka India ka la kiew bha la ka dei ha ka ïoh ka kot ha kine ki thaiñ ba kyndong jong ka ri.
Ka la ong ba kane ka thaiñ ka la ïoh ki jingmyntoi na ki skhim kum ka Ayushman Bharat Health and Wellness Centers bad kiwei.
Na ka liang Anu Nagar, Joint Secretary, ka tnat ka Koit ka Khiah halor ka Health Research, U Sampath Kumar, Principal Health Secretary, Meghalaya bad kiwei ki heh ophisar na sorkar Pdeng bad sorkar jylla ki la ïadonlang ha ka workshop kaba ar sngi ba la pynlong lang da ka Tnat Health Research, Ministry of Health and Family Welfare, ka sorkar India; Indian Institute of Public Health, Shillong bad ka Indian Council of Medical Research – Regional Medical Research Centre, Dibrugarh.
