Shillong Jylliew 19 : Ka Meghalaya State Olympic Association (MSOA) ryngkat ka ARMS PT/EDGE 10 SPORTALITY, da ka jingiatrei lang bad ka Department of Sports & Youth Affairs ka Sorkar Jylla, ka la pynbna ïa ka jingsdang ban pyntreikam noh ia ka Elite Pathway Training 2nd Camp, kaba la long ha ka 17 bad 19 tarik mynta u bnai Jylliew ha JN Stadium, Polo Shillong.
Ka thong jong kane ka prokram ka long ban pynkylla ïa ka rukom pynmih ïa ki nongialehkai na kane ka thaiñ kata da kaba sdang ban hikai, pyntbit ïa ki naduh ba dang rit bad buddien haduh ba kin da pura. Kane ka Elite Pathway Program ka long ruh ka bynta ba kongsan jong ka STAR Program, kaba la pynmih da ka Sorkar Jylla bad pyntreikam pat da ka Edge10 Group, ka kynhun na Australia ryngkat ka Meghalaya State Olympic Association, ban wad bad pyntbit ïa ki riew donsap kiba don ha ka jylla.
Ha kine ki sngi la donlang ruh u Sampat Kumar, IAS, Principal Secretary, Program Implementation & Evaluation Department ka Sorkar Jylla nalor u Ian Campbell, u rangïalehkai Olympic uba la dep ban mihkhmat ïa ka Australia ha ka 1980 Olympics. Nalor kine la donlang ruh u Bah John F Kharshiing, Working President ka Meghalaya State Olympic Association, Bah P.B. War Nongbri, Assistant Director jong ka Department of Sports and Youth Affairs, kiba la pashat lang katto katne ki mat bakongsan. Katba na ka liang u Bah P. Laloo, Joint Secretary ka Meghalaya State Olympic Association bad Kong Isawanda Laloo, Director ka tnad Sports and Youth Affairs, ka Sorkar Jylla ki la pynpaw ïa ka jingkmen ryngkat ka jingkyrmen ba katei ka jingïatrei lang bad ka EPP kan wanrah ïa u soh ka jingjop.
Na ka liang u Bah John F. Kharshiing haba kren ha kane ka jingïalang u la pynpaw ka jingkmen ban sakhi ïa ka Elite Pathway Program na bynta ki nongïalehkai ka Meghalaya. Kane ka prokram da ka jingïatreilang ka MSOA bad ka Edge10 Group, ka la plie lad plie lynti ban lap ïa ki riew donsap bad kumno ban pyntbit ïa ki nongïalehkai. Kane ka prokram ka long kum ka jingsdang jong ka jingkyrmen na bynta ki nongïalehkai ba dang khie da kaba plie ïa ka lad ba kin ïoh ïa ki jingkilan met kiba paka ryngkat ka jingdonlang ki nonghikai kiba kynsai.
Na ka liang u Ian Campbell ha ka jingkren, u la ong ba kane ka jylla nalor ba ka don ïa ka mariang kaba ithiang u lap ba ki don bun ki riewdonsap kiba dang khie. “Hadien ba nga la dep ban peit ïa palat 14,500 ngut ki nongïalehkai lyngba ki jingïalehkai ba harukom ha baroh kawei ka jylla, nga sdang ban sngewhtuh ïa ka jingbun ki riewdonsap kaba don ha ki. Ka jingtbit, ka jinglah kaba la don lypa ha ki, ka pyni ïa ka jingkyrmen na ka bynta ka lawei,” u la ong da kaba pynpaw ïa ka jingsngewnguh ïa u Working President ka MSOA bad ka kynhun kiba la shaniah ha u ban pyniaid ïa kane ka kam shakhmat ban lap ïa ki nongialehkai kiba kynsai bad kiba don ka jinglah ba kin kiew shuh shuh ha ki kam ïalehkai ba bunjait.
Lyngba ka EPP ki la don haduh 14,500 ngut ki khynnah kiba la wan ban pyni ïa ka jingtbit jong ki ha kylleng ki bynta jong ka jylla bad na kine ki la don haduh 200 ngut ei ei kiba la shah jied na ka bynta kane ka program.
Kine ki nongïalehkai ki don mynta ha ka prokram ba shisnem kaba la phiah ha ki ar bynta kaba kynthup ïa ki jinghikai pyntbit ba ai da ki coach bad ruh ka jingpeitngor kaba man ka taiew ban peit ïa ka jingtbit kaba ki don.
