Shillong, Rymphang, 04: Ka Khasi Students’ Union (KSU) South East Central Circle ha ka 27 tarik u bnai baladep ka la pynthymmai ïa ki nongkitkam ba thymmai na bynta ka samoi treikam jong u snem 2024-27
Ïa ka jingjied ïa ki nongkitkam ba thymmai la pynlong da ka jingïathep vote ba la ïashim bynta da ki dkhot jong ka KSU South East Central Circle, Pynursla na ki 8 tylli ki Unit.
Ki nongkitkam ba thymmai ki long u President Wallam Jingshngaiñ Suting, Vice President Basuklang N. Khongwar, General Secretary Vorrozislov Sohklet, Assistant Secretary Sanlang Vennhanan Diengdoh, Organising Secretary Jestice Kharbyngar, Education Secretary Riskhemlang Lyngdoh, Sports Secretary Mewanteiskhem Mawïong, Environment and Cultural Secretary Thawthymmai Suting, Office Secretary Pynskhemborlang Nongrum, Publicity and Information Secretary Pynkiewbiang.
Ïa kine ki nongkitkam la pynskhem da u Organising Secretary ka KSU-CEC u samla Raymond Kharjana.
Ha ka jingai jingkren lyngkot sha ki dkhot ka seng, u samla Raymond Kharjana u la pynkynmaw haba ki samla ki long kum ki nongïalam ne dkhot jong ka seng, kim dei ban khmihlynti jingmyntoi na ka seng namarba ka seng hi kam ju ïoh eiei ban ai ne siew tulop ïa ki kumba long kiwei kiwei pat ki nongtrei ïa kiwei kiwei ki kam bad ong ruh ba ka KSU ka ai jinghikai ïa ki samla bad ïa ki paradoh parasnam kumno ban ieid ïa la ka ri ka jaidbynriew bad ban pynshlur ruh ïa ki samla ba kin long kiba trei shitom khamtam eh haba ki ïaleh ïa kino kino ki mat ba ka seng ka shim ban ïaleh.
“Kum ki dkhot ka seng, ngi dei ban long kiba peitngor bad kiba husiar bha ïa ka jingkren bad jingkynshoit ki katto katne ngut kiba pyrshang ban pynpait pynpra ïa ka jaidbynriew halor ka nongrim jong ka jingsngewpher thaiñ, jingsngew pher niam bad ka jingpynïapher jaidbynriew halor ka ktien ka thylliej ba ngi kren ha ki shnong bad ki dong bapher bapher jong ka Bri Hynñiewtrep,”u la ong.
