Khliehriat, Nailur 12 : Ka All Jaiñtia Youth Welfare Organisation (AJYWO) Central Body bad ka AJYWO – East Jaiñtia Zone ka la aiti da ka dorkhas sha ka Sorkar Jylla lyngba u Deputy Commissioner jong ka East Jaiñtia Hills District ban pynpaw ïa ka jingpyrshah kaba jur halor ka jingthmu ban pynpoi ia ka lynti Rel ha East Jaiñtia Hills District.
Ha ka dorkhas ba la soi da u President ka AJYWO East Jaiñtia Zone, u Bah Heatermoon Ryngkhlem bad u Secretary General ka AJYWO Central Body u Bah Reachingson Siangshai la ai kopi ia ka dorkhas sha ki arngut ki MLA jong ka District, kata, sha u Ma Kyrmen Shylla uba dei u Myntri jong ka Sorkar MDA bad ka Kong Santa Mary Shylla kaba dei ka MLA jong ka Sutnga Saipung Constituency.
“Kumba long kiwei kiwei ki sengbhalang bad u paidbah jong ka East Jaiñtia Hills, bad u paid ka Bri u Hynniewtrep, ka AJYWO ruh, ha kawei ka sur ka pyrshah jur ïa ka jingthmu jong ka sorkar jylla ban wanrah lynti rel ha ka District, halor ka nongrim jong ka jingbym pat pyntreikam ïa ka Inner Line Permit (ILP) tad haduh mynta ruh ha ka jylla, kumba la leh lang ha kiwei pat ki jylla jong ka thaiñ shatei lam-mihngi ka ri India, ïa kaba ka sorkar jylla ka la shim ïa rai ha Ingdorbar Thawaiñ, naduh u snem 2019, ban pyntreikam ïa ka na ka bynta ban ïada ïa ki trai ri trai muluk rit paid jong ka jylla, hynrei kaba la shu leh lyndet mynta da ka sorkar jylla bad sorkar pdeng,” ong U Heatermoon Ryngkhlem, President ka AJYWO-East Jaiñtia Zone.
“Ka Jylla Meghalaya ka dei ka jylla kaba rit tam ha ka ri India, kaba dei ka ri ka muluk trai jong ki jaitbynriew riewlum barit paid tam, bad ba dang sahdien tam ha baroh ki liang, kaba don mynta hapdeng ka jingma kaba khraw na ka jingshah tyllep ha kiwei pat ki jaitbynriew heh paid na ri thor India, kiba la ïawan rung ïawan mih, ïawan shong ïawan sah, ,ïawan trei ïawan ktah, ïawan kamai ïawan kajih katba mon ha ka jylla khlem da don ka aiñ kaba pyrkhing bha ban tehlakam ïa kane, kaba la ktah bad buh shisha ha ka jingma kaba khraw ïa ka ri bad ka jaitbynriew rit”, bynrap bïang u Bah Ryngkhlem.
“U Bah Ryngkhlem u la bynrap shuh shuh da kaba ong ba, ym lah ban len, ba ka jaitbynriew jong ngi mynta ka don ha ka jingma kaba khraw, bad ba kane ka pateng kaba mynta ka lah ban dei ka pateng kaba khatduh eh lehse ka ban wad ïa ki lad ki lynti ban ïada ka jaitbynriew rit paid jong ngi lym kumta yn nym don shuh lehse mano mano ruh em ban leh ïa kata. Kumta lada ma ngi kiba mynta, ngim ïatrei mynta hi ban ïada ïa ka jaitbynriew lajong mano pat bad lano ka jingshongsuk shongshngaiñ bad ka jingim laitlud jong ka Jaitbynriew ha la ka jong ka ri wat lada duk da kyrduh ruh ka kham kor shi katdei eh ban ïa ka roi ka par ka ban tuh noh ïa kita baroh na ngi.”
“Ka East Jaiñtia Hills, ka dei ka district kaba rit, kaba don tang 1,22,939 tam ngut ki trai shnong kat kum ka PPF, 2011 Census. Tang lyngba jong ki surok ka la long lypa ka District kaba la shah jan shah tap tyllep da ki briew kiba nabar ka jylla, kaba la ktah mynta haduh katta katta, ïa ka ïoh ka kot, ka khaïi ka pateng bad wat ïa ka jingbun paid bad ruh ïa ka jingshongshngaiñ jong ki trai shnong bad sa katno tam lada ka lynti rel kan wan” bynrap u kyrwoh.
“Lada ka lynti rel kan wan, kan plie lad shuh shuh ïa kiwei ki jaidbynriew heh paid, na ri thor ri India ban wan rung wan mih, wan shong wan sah bad ruh wan kamai kajih bad wan trei wan ktah katba mon shapoh jong ka District ka ban sa ktah shuh shuh ïa ka ïoh kam ïoh jam jong ki trai trai shnong khamtam ïa kito kiba don truck bad ïa baroh kito kiba im jaka kpoh na ki truck. Wat ki mar rep trai ri trai muluk ruh kin sa shah ktah jur namar kiba kum kita kin sa wan rung suk lyngba katei ka lynti rel na kiwei pat ki jylla, “ la bynrap u Secy. General ka AJWYO Sengkmie u Bah R. Siangshai.
Ka AJYWO ka ai jingmut sha ka Sorkar Jylla ba kan pynleit jingmut ban wanrah ïa kiwei ki kam pynroi ba donkam kyrkieh eh ha ka District, kum kaba pynbha ïa ki jaka ai jingsumar ïa ka koit ka khiah, kaba pynshna ïa ki surok ban pynïashnoh ïa ki thaiñ nongkyndong, kaba wanrah ïa ka Government Secondary, Higher Secondary School bad ka Government College, kaba wanrah ïa ka District Auditorium cum Library, kaba maramot wut wut ïa NH-6 ba la isangsot mynta bad ban wanrah da ka surokbah sawlaiñ (Fourlane) naduh Damsite, Ri Bhoi District haduh Malidor East Jaiñtia Hills District bad kiwei kiwei de ki kam pynroi pynpar ba donkam kyrkieh.
