Shillong, Jylliew, 24: Ka Ingdorbar Thawain jong ka Khasi Hills Autonomous District Council ha ka Sngi Saitjaiñ ka la mynjur da ka Official Resolution ban phah ka jingthoh sha ka National Law Commission kum shi bynta ban pyrshah ia ka jingthmu jong ka Sorkar National Democratic Alliance (NDA) ba la ialam da ka seng Bharatiya Janata Party (BJP) ban pyntreikam noh ia ka aiñ Uniform Civil Code (UCC) ha ka ri India baroh kawei.
U Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem haba wanrah ia kane ka mat hapoh ka Dorbar Mang Tyngka u la ong ka jingthmu jong ka Sorkar Pdeng ban pyntreikam noh ia ka Uniform Civil Code ha ka ri India, kan ktah bad kan pynduh pyndam ia ki riti ki dustur, ki ain tynrai, ka ain shongkha shongman, bad ka hok ban mane Blei laitluid.
Ha ka jingiatai halor kane ka mat, la iashim bynta da u Nongialam ka Liang Pyrshah u Bah Titostarwell Chyne, u MDC shusieh Bah Bindo M. Lanong bad u Deputy Chief Executive Member u Bah Pynshngain N. Syiem.
