Shillong, Jylliew, 08: Arngut ki runar ki la shah kem ha ki Pulit jong ka Laitumkhrah Police Station halor ka jingdonkti ban thombor ia ki arngut ki shijur katba ki dang leit iaid kai pyngngad ha ka janmiet sngi sngi saitjaiñ jong ka taiew baladep ha ka khlaw.
Katkum u kyrwoh ba la phah da u Superintendent of Police ka East Khasi Hills District u Bah S. Nongtnger, la iathuh ba ki Pulit ki la ioh jingtip na u Secretary Shnong ka shnong Risa Colony ha ka por 7:20 baje janmiet ba ki don ki runar kiba thombor ia kawei ka kynthei ha khlaw.
Ka kynhun ki Pulit ka Laitumkhrah Police Station mar mar ki la leit sha ka khlaw bad lap ba kawei ka khynnah kynthei bad uwei u samla shynrang uba la 18 snem ka rta ki la leit iaid kai pyngngad sha khlaw ha kaba ki la shah khang kdong ha ki lai ngut ki runar. U SP u la pyntip, ki lai ngut ki runar ki la byrngem ia kine ki shijur ba balei ki wan iaid kai sha khlaw bad dawa ruh ba ki dei ban siew ia ka kuna. Arngut napdeng ki runar ki la ktah kti ia u shynrang, katba uwei pat u runar u la bat trait ia ka kynthei.
U shynrang u la kyrpad ia ki runar ba kin pyllait noh ia ka kynthei bad kular ba un kohnguh ban leh kat ia kaba ki hukum hynrei ki arngur ki shijur ki la shah pynbor ba kin law lyngkhuid hakhmat jong ki. Ki runar ki la lute ruh na kine ki shijur. Katba ki arngut ki runar ki dang bteng ban shoh ia u shynrang, u la lait phet da ka said na ki tyrsim jong kine ki runar bad mareh bak bak sha jaka ba don ki iingbriew ha Risa Colony ban pan jingiarap bad kine ki lai ngut ki runar ki la jrong kti ia kane ka khynnah kynthei.
Ha kaba iadei bad kane ka jingjia, ki Pulit ki la register case ha Laitumkhrah Police Station Case hapoh ka Section 323 Indian Penal Code (IPC) read with Section 7/8/9/10/11/12 POCSO Act. Ha jingthwet kaba jur, ki Pulit ki la ioh kem ia ki arngut ki runar ha ka sngi Balang na Khliehshnong Malki. Mynta ki Pulit ki dang pynlong ia ka jingthwet kaba jur ban iohkem sa ia uwei pat u runar uba dang lait phet.
