Shillong, Naitung, 04 : Ka Hynñiewtrep Youth Council (HYC) ha ka sngi baar ka la kyrpad ia ka Law Commission ban ai jingmut ia ka Sorkar Pdeng ba kan ym pyntreikam ia ka Uniform Civil Code (UCC) ha Meghalaya.
Ha ka shithi ba la phah sha u Member Secretary jong ka Law Commission, u President ka HYC u Bah Robertjune Kharjahrin u la ong, “ngi kwah ban ai jingmut ia ka Commission ba kan ai jingmut ia ka Sorkar Pdeng ba kan ym pyntreikam ia ka UCC ha Meghalaya namarba kan pynjngut bad kan bujli ia ki riti ki dustur kiba la don lypa, kan pynjngut noh ia ki kyndon jong ka Sixth Scheduled bad ia ka iktiar jong ki Autonomous District Councils, kan pynkheiñ ia ka jingiasam ia ka bor treikam hapdeng ka Sorkar Pdeng bad ki Sorkar Jylla bad kan tuklar ruh ia ki kam kiba iadei bad ki niam.”
“Shuh shuh, ngi ai jingmut ia ka Commission ba kan ai jingmut ia ka Sorkar India ba kan iarap ia ki Autonomous District Councils ha Meghalaya ha ka jingkyrshan pisa bad kiwei kiwei de ki lad jingiarap bad ban ialam lynti ha kaba pynlong aiñ ia ki aiñ bapher bapher,” la bynrap ka seng.
U Bah Kharjahrin u la ong ba ki ADC ha Meghalaya ki hap hapoh ka Sixth Scheduled jong ka riti synshar ka ri India ki dei kiba la pynkup bor ban shna aiñ halor ka shongkha shongman, ka jingioh pateng ia ka spah ka phew, ka riti ka dustur ba kynthup ia ka jinghiar pateng, ka jingting khun, ka jingpynryntih ia ki kam kur bad kiwei kiwei ki aiñ. La jan palat 72 snem ka jingdon jong kine ki ADC ha Meghalaya, tad haduh mynta ki la pyndep ia la ka kamram ban iada bad ban pynneh pynsah ia ki riti ki dustur jong ka jaidbynriew Khasi-Jaiñtia ha kaba iadei bad ki aiñ.
Ki riewlum ritpaid ka jylla ki dang don ka jingshahniah ha kine ki ADC bad ki dang iai kwah ban shah synshar da ki riti ki dustur bad ki jingngeit kiba la don lypa. Ki riewlum ritpaid ka Meghalaya ki pyrshah jur ia kano kano ka jingthmu jong kano kano ka bor kaba thmu ban pynjngut noh ia ki riti ki dustur kiba la don lypa ha kine ki rilum naduh hyndai hynthai.
“Namarkata, ngi lah ban ong ba ki riewlum ritpaid ka Meghalaya ki da pyrshah jur ia kano kano ka jingpyrshah ban wanrah ia ka Uniform Civil Code namarba ym tangba kan pynjngut hynrei kan bujli noh wat ia ki riti ki dustur kiba la don lypa ha ka jylla,” u la ong.
“Ka Jylla Meghalaya ka la don lypa ia ki aiñ kum ka shongkurim, ka jingiapyllait san shyieng, ka jingioh pateng, ka jingting khun bad kiwei kiwei bad ia kine la pyntreikam bad la pdiang ruh da ki paidbah jong ka Jylla. Lada ka Parliament jong ka ri India ka wanrah ia ka UCC, kan pynkheiñ ia ka jingiasam bor hapdeng ka Sorkar Pdeng bad Sorkar Jylla katkum ba la kdew ha ka riti synshar ka ri India ia kaba yn ym lah satia ban pdiang,” la ong ka Seng.
Haba pynpaw ba ka India ka dei ka ri kaba kdup ia ki jaitniam bapher bapher, ka HYC ka la ong ba katkum ka riti synshar ka ri India ka dei ban ai jingiada ia kawei pa kawei ka jait niam. Ka Meghalaya ka dei ka jylla ha kaba bun ki nongshong shnong ki dei ki Khristan bad ki don ruh ki briew kiba dang bat ha la ka niam tynrai ryngkat bad kiwei kiwei pat ki jait niam kum ki Hindu, ki Muslim bad kiwei kiwei.
“Ngi sngew ba ka dei ka kamram jong kano kano ka Sorkar ban burom ia kawei pa kawei ka jaitniam da kaba ailad ia kine ki jait niam ba kin bud ia la ki jong ki rukom ngeit bad ym ban bujli noh da ki kyndon kiba don katkum ka Uniform Civil Code,” u la ong.
U la bynrap ba ka riti synshar ka ri ka kyntiew ia ki riti ki dustur bapher bapher, ia ki jaitniam bad ia ki jait ktien bapher bapher. Ka dei ka jingsngew jong ngi ba ki polisi kum ka UCC kin wanrah jingkulmar bad donkam ban kyntait beit mardor. Shuh shuh ka 21st Law Commission of India hadien ba la bishar sani bha ha kaba iadei ba ka jingpynthymmai ia ka Family Law ha ri India ka la aiti ia ka kaiphod ha u Nailar, 2018 bad ka la ai jingmut ba ka Uniform Civil Code kam da long eh kaba donkam lane kaba dei beit ban pyntreikam,” u la ong.
