Nongstoiñ, 7 Jylliew: Kum shi bynta ban iada ia ki khynnah skul bad ban lait na ka jingshah ktah ha ka jingshit kyrang ka sngi na ka liang jong ka Khasi Students’ Union, West Khasi Hills District ka la phah da ka dorkhas sha ka Sub- Divisional School Education Officer (SDSEO) Nongstoin ban phah sangeh ieng lain shwa shipor ia ki khynnah skul ha baroh ki skul.
Na ka liang u President ka Seng u Bah Johnfisher Nongsiang, u la ong ba ka Seng kala ioh shibun ki jingujor na ki kmie ki kpa kiba sngew khuslai na ka bynta la ki jong ki khun namar ka jinglong shit kyrang palat jong ka suiñ bneng kaba la lam ruh sha ka jingioh pang ki khynnah.
U la iathuh ruh ba ha kine ki sngi ki la don ruh ki khynnah skul kiba la kyllon katba dang ieng Assembly bad ki don ruh kiba la iohpang namar ka jingshit palat jong ka suin bneng.
Namarkata, na ka liang jong ka seng ka kyntu jur ia ka SDSEO ba kan sngewbha ban shimkhia ban phah sangeh shwa ia ka jingieng Assembly ha ki skul namar kane ka lah ban ktah ia ka koit ka khiah jong ki khynnah skul.
