Shillong, Nohprah, 13: Da ki hajar ngut ki parakur Warjri ki la poi sha ka sngi rakhe ia ka lyngkhuh snem ba arphew san jong ka Seng Kur Warjri ha shnong Thynroit. Ka rakhe baphuh baphieng la wan pynshngaiñ lang da ki rangbah jong ka Synjuk Ki Rangbah Kur Ka Bri U Hynñiewtrep bad ki samla nongialam jong ka seng Hynñiewtrep Youth Council. Ka jingrakhe ka pynlong ruh ia byllai ki kam pyninam ia ki sap ki phong jong ki khynnah bad samla na ka kur Warjri ha baroh shisnem ki ba kynthup ia ka Football, Basketball, Painting, Essay, Poetry, Dancing, Music bad ha ka step jong ka sngi long dorbar la pynlong da ka Marathon. Hadien kata la bteng ka Dorbar ba la kren da ki rangbah kur Warjri bad la sam ia ki khusnam jop jong ki samla ki ba lahduh ha ki kam pynisap bapher bapher bad la pyninam ruh ia ka rwai ka shad na ki nongjop bad nonghikai ba kynthup ia ka shad da I Dapalei Warjri bad ka kynhun bad ka jingrwai da I Noury Warjri.
Nalor ki jingiakob pyninam bapher bapher, la pynkup burom ruh ia ki samla na ka kur ki ba la kiew shaphrang ha la ki jingtbit ba shimet jong ki ba kynthup ia ka samla Ellerene Warjri ba la ioh ka nam lahduh kyrdan ba-ar ha ka Bachelor of Education Examination, 2023, NEHU, Obinas Warjri ba la ioh takma ksiar ha ka 5th Annual National Martial Arts Games, Badahunshisha Warjri ba ioh kyrdan ba-ar ha ka Poster Contest 2023 da ka Forest and Environment Department, Meghalaya ha ka ba synrop bad ka Global Tribal Forum. Kumjuh ruh la pynkup burom ia ki rangbah kur ki ba la kitkhia ia ka Seng Kur Warjri naduh ba la seng na arphewsan snem mynshwa, bad la ainam aiburom ia u khliehduh ba nyngkong, Bah D L Warjri (bam kwai ha dwar U Blei) ba la pdiang sngewbha da ka takma sahnam ha I kmie ki khun Kong P O Kharkongor, ba la synran lang bad ki khun ki kti.
Ha ka ba pynwai noh ia ka jingrakhe la pynhiar lama da ki rangbah kur Warjri ba kynthup ia u Bah George A Warjri, Bah Sunshine Warjri, Bah P Barkos O Warjri, Bah R V Warjri, Bah Kestar Warjri bad kiwei kiwei ki rangbah kur na ka seng kmie. Ha kane ka sngi rakhe la ioh jingkren na u Bah Shakliar Warjri, myntri sorkar jylla, u Rangbah R L Kharpran, Symbud Khliehduh ka Synjuk ki Rangbah Kur bad na u Samla Roy Kupar Synrem, khliehduh ka Hynñiewtrep Youth Council. U Bah Shakliar Warjri u la pynpaw ka jingkmen bakhraw na ka bynta ka jingrakhe lyngkhuh arphewsan snem jong ka Seng Kur Warjri bad u la kyntu ia ki rangbah ban kin dang iai duriap ban pyniar ia ki kam jong ka Kur Warjri. U Rangbah R L Kharpran u la kren mardor halor ka jingdonkam ban tehsong ia ki seng kur ha satlak ka Ri Khasi bad ban pynskhem ia ka longkur longkha. Kum shi bynta jong ka jingrakhe ia ka lyngkhuh arphewsan snem jong ka Seng Kur Warjri la rakhe ruh ia ka snem thymmai katkum u bnai bneng ki Khasi ba la maitphang da u Bah Raphael Warjri bad la ioh jingkren na u Bah Roy Kupar Synrem u ba la kyntu ia ki paidbah ban long ki ba tipkur tipkha, tipbriew tipblei bad kamai ia ka hok da ka ba kdew artat ba ka tipkur tipkha ka long ka ba kongsan na ka bynta ka lawei jong ka jaitbynriew ha baroh ki liang.
Ki samla ba jop ha ki jingiakop ki long ha ka Mareh Marathon na ka liang ki shynrang u ba jop kyrdan nyngkong dei u Teibanstone Warjri na shnat Thynroit, kyrdan baar u Denzil Gordy Warjri na Mawlai, kyrdan balai u Bateiskhem Warjri na Thynroit. Na ka liang ki kynthei ha ka Marathon la jop kyrdan nyngkong da ka Aquilin Warjri na shnat Wahlang, kyrdan baar Banrisuk Warjri na Wahlang, kyrdan balai Shishabahun Nongkynrih, na ki nongshimbynta ba khynnah tam dei u Morgan Jones na shnat Sohryngkham, bad ba tymmen tam dei I Langtimai Siejiong bad ki ba la ioh takma tang ban pyntngen ki long Phibanshimti Warjri na shnat Nongkynrih, Sanhil Warjri na Thynroit, bad Anginia Warjri na Umphrew shnat Umrynjah. Ha ka Basketball na ka liang shynrang la jop ka shnat Mawlai pyrshah ia ka shnat Mawprem, liang kynthei la jop ka shnat Mawlai pyrshah ia ka Wahlang; ka shnat Mawnai ka la jop ha ka Football pyrshah ia ka shnat Urur Rangshken, bad ki wei ki khusnam shimet ki long Best Goalkeeper la jop u Freddy Fender Warjri na shnat Manai, Top scorers la jop da u Balajied Warjri na Manai bad Shimbor Warjri na Urur Rangshken, Best player la jop da u Balajied Warjri bad Promising Football player la jop da u Micky Berth Warjri. Ki nongjop ha ka Pyniriam na ki ba rit ba long kyrdan nyngkong u Wanbok Warjri, (Mawkneng), kyrdan ba ar ka Marbakordor Warjri, (Siejiong), kyrdan balai u Mebanshngain Warjri, (Siejiong) ha ka Pyniriam baheh pat ka Graceful joy Warjri (Mawkneng) kyrdan ba nyngkong, ka Wandarika Stella Warjri (Sohryngkham) kyrdan baar, ka Cynthia Warjri, (Upper shillong) bad ka Iaphira Warjri, (Mawkneng) ki jop kyrdan balai. Ki nongjop ha ka Thohdur ki long u Bankhraw Warjri, Lummawbah kyrdan ba nyngkong, ka Naphida B Warjri, Mawprem kydan baar, Badahunshisha Warjri , Pyndengumiong kyrdan balai bad u Mewanshwa Warjri, Siejiong ba dang khyndai snem la ainam kyrpang da ka khusnam bad syrnot. Ki ba jop ha ka rwai ba heh ki long ka Noury Warjri (Laitkor) kyrdan ba nyngkong, ka Ibasuklang Warjri (Siejïong) kyrdan baar, bad ka Ibapynjanai Warjri (Mawkriah) kyrdan balai. Na ki barit ha ka rwai pat la jop kyrdan nyngkong u Hamebansan Warjri – Nongmynsong, kyrdan baar ka Ila Warjri – Kynshi, kyrdan balai ka Shisha Warjri – Mairang. Ha ka iakop thoh Essay ki nongjop ki long kyrdan nyngkong ka Sharina Warjri, kyrdan baar ka Dollyrene Warjri na shnat Mawkneng, kyrdan balai ka Ibapynsuk Warjri na shnat Myrkhan. Ha ka iakob thoh poitri la jop ka Bamisha Warjri shimet bad ha ka iakob shad la jop kyrdan nyngkong ka Dafini Warjri na shnat Mawkneng, kyrdan baar ka Jesika warjri na shnat Mawkneng bad ka ka Letizia Warjri na shnat Mawprem.
….……………….
