Shillong, Nohprah, 13: ka Seng Kur Lyngdoh Thabah Seng Kmie ka ban sa rakhe ïa ka Jubili Ksiar ha ka 16 tarik mynta u bnai ha Jaïaw Lumpyllon Dorbar Community Hall ka la khot bad wer ïa baroh ki parakur kiba don ha kylleng ka Bri u Hynñiewtrep ban ïashim bynta lang ha kane ka sngi.
U President ka Kur u Bah N.R. Thabah u la ng ba ha kane ka sngi, kin sa don bun tylli ki prokram.
U President u la kyntu ruh ïa ki parakur kiba ju ai tang ïa ka jait Lyngdoh hynrei ki dei ban da thoh pura ïa ka jait Lyngdoh Thabah. “Ki don bun ki jait Lyngdoh ha rilum Khasi bad Jaiñtia, bad namarkata ka long kaba donkam ban pyndonkam beit ban thoh da ka jait Thabah, khnang ba kan ym pynbakla bad ban kiar na kaba wanrah ïa ka jingïasngewthuh bakla ha ka rukom ïakheiñ kur,” u la ong.
U General Secretary jong ka Seng Kmie u Bah R.B. Thabah u la ong ba ha kane ka jingrakhe yn sa pynkup burom ïa kiba pas bha naduh SSLC haduh Ph.D, bad kumjuh ruh yn sa pynkup burom ïa ki riewtymmen jong ka Kur kiba la kynjoh ïa ka rta kaba la 85 snem.
“Ka jingwan lyngshop ka khlam jingpang 2020 ka la khanglad ïa ngi ban pynkup burom ïa ki khun ki pyrsa jong ka kur, hynrei ha kane ka sngi yn pynkup burom ïa ki khun ki pyrsa kiba la pas bha naduh u snem 2021 haduh u snem 2023,” u la ong.
U la ïathuh ruh ba kin don kumba 500 ngut ki dkhot jong ka kur na kylleng ka jylla ki ban sa ïashim bynta ha kane ka sngi, la ïathuh u President ka Seng Samla Seng Kur Thabah u Bah Kiewshaphrang JW Thabah. U la pyntip ba ki nongjop ha ka raffle ticket draw yn sa pynbna hi ha kane ka sngi.
U General Secretary jong ka Seng Samla Seng Kur Thabah u samla Banteibor Thabah u la pyntip ba ka kur kan sa pyllait paidbah ïa ka Almanak 2024, bad kyntu ruh ïa ki parakur Thabah ba kin shimkhia ban poi lang sha kane ka jingrakhe ïa ka jubili ksiar.
