Shillong, Jylliew, 09: Ka Social Foresty Division, East Khasi Hills District ha ryngkat ka jingïatreilang bad ka ophis u Syiem ka Hima Sohra lem ka Dorbar Shnong Mawrah, ha ka 09 tarik u Jylliew, 2023, ki la pynlong ia ka prokram rakhe sngi pynneh mariang ha ka jaka jngohkai ba itynnad bha kaba don ha Rangkylliaw ha katei ka shnong Mawrah da kaba buh thong ban pynjyrngam da kaba thung kham bun ki dieng ki siej ha katei ka jaka jngohkai.
Ha ka jingïalang la ia donlang da ka Kong H. Lato, District Forest Officer, IFS, Social Foresty Division, East Khasi Hills Sohra Range, u Pa’iem Marremdor Syiem uba dei u Paiem Khynnah ka Hima Sohra, ki ophisar, ki Myntri ka Hima, ki nongialam shnong ka shnong Mawrah, Swer, ki khynnah skul lem ki nonghikai ryngkat ki nongshong shnong.
Katei ka jaka jngohkai ka dei kaba la pynitynnad da ki jingshna ia ka jingkieng iaid kjat, ki jingker, ki lynti ïaid kjat, ki mawbynna nalor ka jingitynnad mariang kaba la don lypa ha kane ka jaka. Ka thong jong kane ka prokram ka long ban ïakhun pyrshah ia ka jing-pyndonkam plastic ha ki sawdong sawkun ka mei mariang da kaba pynsngewthuh janai sha ki nongshong shnong ban long ka nuksa.
Hadien ka jingïalang la don ka jingthung dieng ha katei ka jaka da ki riewkhmat kiba la don ha ka jingïalang bad ia shim bynta ruh da ki nongshong shnong bad ki khynnah skul. Ka tnad Forest lyngba ka Kong H Lato ka la pynpoi ruh ia ki pla thep tiar thep tar bad sam sha ki nongshong shnong kum ka sienjam ban kiar na kaba pyndonkam plastic.
Halor kane ka jaka jngohkai, u Secretary ka Dorbar Shnong Mawrah, u Bah Dibarstar Khongrymmai u la ong ba ka dei lyngba ka skhim MGNREGA ha ki san bad hynriew snem kiba la dep ba la lah ban shna ia kine ki jingkieng bad jingker ha katei ka jaka ha Rangkylliaw kaba lah ban iohi bad jngohkai ia ka thaiñ Khatarshnong baroh kawei nalor kiwei pat ki jaka.
U la ong ba ki dang donkam shibun ki lad jingiarap ban kyntiew shuh ia kane ka jaka jngohkai bad ba kan long ka lad kamai ia ki nongshong shnong.
