Shillong, Jylliew 08: Ka Confederation of Ri Bhoi People (CORP) Western Zone mynnin ka sngi balang ka la pynkupburom ia u samla Banpynshngainlang Thangkhiew uba la pass ia ka eksam klas XII Arts 2023 jong ka Meghalaya Board of School Education ha ka kyrdan basaw ha ka thup top ten.
Ha kane ka sngi u Bah Gershome Hat Vice President ka CoRP Sengkmie lem bad kiwei ki dkhot ka Jirang Circle ki ai jingkren kyntu kynpham bad kitbok ia u samla Pynshngainlang bad un nangkiew shaphrang ha ki jingpule ha ki snem ban wan ban poi sha kliar ka nam bad ka burom.
U Bah Hat ula ong, ka jinglehbha jong u ha ka eksam klas XII wat hapdeng bun ki jingeh ka wanrah burom ia ka iing ka sem ka shnong ka dong Ri Bhoi sepngi bad ka District baroh kawei.
Kumta na ka liang ka seng CoRP ka la pynkup burom halor ka jinglah jong u ban leh bha ia ka eksam klas XII kum ka dak ban ai mynsiem bad pynshlur ba un iai bteng bad minot ha ki jingpule da ka mynsiem tip briew tip blei bad kyntu ban kiar na ki jingmlien ba sniew kiba lah ban pynjot ia ka jingim ki khun samla bad ka kyrmen ba lyngba kane ka jingjop jong u ban wan shakhmat eh kan ai mynsiem lang ia kiwei ki khynnah pule ka thain ba kin nangtrei shitom bad minot ha ki jingpule ha ki snem ban wan ban wanrah burom ia ka shnong bad ka thain Ri Bhoi Sepngi.
