Shillong, Nailar, 24: Ka Shillong Municipal Board (SMB) ha ka sngi palei ka la kyrpad ïa baroh ki nongshong shnong ban bud ryntih ïa ki kyndon jong ka Rule 4 jong ka Solid Waste Management Rules, 2016.
Ha ka jingpynbna, ka Municipal ka la pyntip ba ki paidbah ki dei ban pynïakhlad ïa ki jaboh ha ki lai bynta, kata kiba pyut, ki bym pyut bad ki tiar jaboh ba mynsaw ha ki borti bret jaboh bad ban aiti ïa ki jaboh ba la pynïakhlad sha ki kali ba la buh kyrpang ban lum sha manla ki shnong.
Dei ban da song bha ïa ki jingsop ba ladep pyndonkam kum ki Diaper, Sanitary Pads bad kiwei kiwei, ha ki pla ba la ïoh na ki jaka shna lane na ki nongpynmih ïa kine ki tiar lane ban da song bha ïa ki jingsong bad ban thep bha ha ki borti ba la buh kyrpang ban bret ïa ki tiar ba rkhiang lane ki tiar ki bym pyut.
Ban pynlang la ka jong ïa ki tiar shna iing bym long shuh ban pyndonkam bad ban bret katkum ki jingbthah ba la pruiddak ha ka Construction and Demolition Waste Management Rules, 2016;
Yn ym shah ban shu bret pathar, ne thang lane ban tep ïa ki jaboh ba leit bar da ki briew ha surok, ha ki jaka paidbah lane shabar ki phyllaw ing lane ban shu pyntuid sha ki nala bad sha ki wah duid.
Ki nongdie madan ki dei ban da buh ïa ki borti ban pynlang shi jaka ïa ki jaboh ba la bret na ki jingbam, ïa ki pliang pastik ne kot, ki jingsong, ki jingbam ba la bret, ki soh, ki jhur bad kiwei kiwei bad dei ban aiti ïa kine ki jaboh ba ladep pynlang sha ki kali ba la buh kyrpang ban lum.
Ka Municipal ka la bthah ruh ïa ki Hotel bad Restaurants ba ki dei ban pynthikna ban pynïakhlad ïa ki jaboh na jaka buh bad ban aiti pat sha ki kali kit ñiut.
Shuh shuh, ban pyntreikam ïa ka thong kaba kynjoh shi spah na ka shispah ban pynlang ïa ki jaboh, la pyntip paidbah ba naduh ka 1 tarik, Risaw, 2023 ka Shillong Municipal Board (SMB) kan sangeh noh mardor ban lum ïa ki jaboh ba la shu pynlang shi jaka bad lada lap ïano ïano ki bym pynïakhlad ïa ki jaboh naduh ka jaka lum kin shah daiñ kuna hangto hangto katkum ki kyndon jong ka Meghalaya SWM Bye Laws 2020.
Ka jingdaiñ kuna kan long na ka por sha ka por ba la pynkheiñ ïa ki jingbthah.
