Shillong, Risaw, 10: Ka kynhun jong ki nonghikai SSA kiba don hapoh ka shatri jong ka Meghalaya SSA School Association (MSSASA) ba la lamkhmat da u President u Bah Aristotle C. Rymbai ha ka sngi Palei ki la leit ban ïakynduh markhmat ïa ka kynhun jong ki nonghikai SSA kiba don hapoh ka shatri jong ka All Meghalaya SSA School Teachers Association (AMSSASTA) kiba pynlong ïa ka jingïakhih ba khlem pud sngi ha Madan Malki, ban ïakren sngewthuh na ka bynta ban ïatreilang ka jingdawa ba kine ki ar tylli ki kynhun jong ki nonghikai SSA ki la buh hakhmat jong ka Sorkar.
Kum ban shu pyntip hangne, ka AMSSASTA ka la dawa ïa ka Sorkar Jylla ban kyntiew ïa ka tulop shi spah na ka shispah, katba ka MSSASA ka la dawa ïa ka Sorkar Jylla ban pynkynriah noh ïa ki 13 hajar ngut ki nonghikai SSA na ka State Implemetation Society (SIS) sha ka tnat Pule Puthi khnang ban pynskhem ïa ka kam hikai skul ka jong ki.
Ha ka jingïakren bad ki lad pathai khubor u Bah Rymbai u la ong, “ka jingwan mynta ka sngi ka long ban ïakren sngewthuh bad ki ban ïatreilang halor ki mat jingdawa na ka bynta ka jingmyntoi jong ki nonghikai SSA.”
“Ha kaba ïadei bad ka jingai jingkyrshan, ngi ladep ïakren (bad ki nongïalam jong ka AMSSASTA) bad ki la pynshai ïa ka jingïaid lynti bad ma ngi ruh ngi la pynshai ïa kajingïaid lynti. Ngi la ïakut ba ïa kane ka mat ngin sa rah hapoh ka General Executive Committee jong ka MSSASA bad ka AMSSASTA ban shim ïa ka rai,” la ïathuh u Bah Rymbai.
“Ngi la ïakren ïa ka jingïaid lynti jong ngi bad ka Sorkar ha kaba ïadei bad ki ar tylli ki mat, kumba ngi ïohi mynta, ki ïaid la ka jong ki jingdawa. Ngi la pynshai ba ngi la don ka jingïakren bad ka Sorkar naduh u bnai Naitung, 2022 ban pynlong ka jingïakhih. Hadien ka jingkhot ïakren jong ka Sorkar, na ki saw tylli ki mat jingdawa, kata, ban pyllait ïa ka tulop kaba san bnai, ban siew tulop tista manla u bnai, ban pynkiew tulop bad ban pynskhem noh ïa ki nonghikai skul SSA kum ki shakri Sorkar,” u la ong.
“Ar tylli ki jingdawa ka Sorkar ka ladep pyntreikam, katba ïa ka jingpynkiew tulop bad ïa ka jingpynskhem ïa ka kam hikai skul, ka Sorkar ha kato ka por ka la pyntip ban sa thaw da ka State Education Commission ban ïakren halor kine ki ar tylli ki bynta. Hapoh ki ar snem ngi la ïoh ban shong jingïalang bad u Symbud Myntri Rangbah, u Myntri ka tnat Pule Puthi bad ki Ophisar jong ka tnat Pule Puthi,” la ïathuh u Bah Rymbai.
Haba kylli, u la ong, “kum ki nongïalam ki kwah ban don beit tang kawei ka Kynhun (jong ki nonghikai skul SSA) hynrei ban pynbor ngim lah. Lada ngi lah ban ïatylli ka dei ka jingkmen ïa ngi.”
“Ka jingsngew skhem jong ngi ba ka Sorkar kan wanrah ïa ka polisi ban pynkynriah ïa ngi na ka State Implementation Society sha ka tnat Pule Puthi ka long shi spah na ka shi spah. Ngi sngewthikna namarba ka SSA hi ka dei jingkyrshan pisa kaba wan na ka Sorkar Pdeng. Ki don ki kyndon ba ki Jylla ki hap ban bud. Ka Jylla, Assam, Manipur, Nagaland, Arunachal bad kiwei kiwei ki ladep shim ïa ka rai ban pynkynriah ïa ki nonghikai SSA sha ka tnat Pule Puthi. Kaba sah mynta, lada ïakren ha kane ka thaiñ Shatei Lammihngi, dei sa tang ka jylla Meghalaya,” la pynpaw u Bah Rymbai.
“Halor ka NCTE Norms, ngi ruh ngi sngewthuh haba kynthup lang ïa ngi sha ka tnat Pule Puthi, ki don kyndon kiba dei ban bud. Kam kut tang katta, ha ka por ba thungkam ïa ngi ha ki snem ba dang sdang ka SSA ngi la long Qualified ha kato ka por. Halor kane ka bynta, ngi la shong jingïalang bunsien bad ka Sorkar ban ïakren kumno ban wanrah ïa ka polisi khnang ba ki nonghikai ki bym kot ïa ka NCTE Norms kin ym shah ktah. Kane ka jingïakren ka dang ïaid haduh mynta. Ha kawei ka sngi, ngin sa lah ban wanrah ïa ka rai kaba lah ban pynmyntoi lang ïa baroh ki nonghikai,” la bynrap u Bah Rymbai.
Na ka liang jong u Adviser ka AMSSASTA u Bah Batista M. Lyngwa u la ong, “ïa ka jingtyrwa jong ka MSSASA ngin hap ban khot shwa da ka General Executive Commitee ban ïathir ïatai watla na ka liang jong ka AMSSASTA kan dang bteng beit shakhmat ban pynurlong ïa ka jingdawa kumba ngi la pynlong ïa ka jingïakhih kaba khlem pud sngi kaba la kynjoh sha ka sngi kaba shiphew.”
“Kumba ki (MSSASA) la ïakhih ha u snem 2022 ngi la ai ka jingkyrshan bad ïa kane ka jingïakhih jong ngi mynta ruh ai ba ngin pyndep shwa kumba ngi la sdang. Ngin ym lah hi ban ong to ngin ïa trei noh mynta mynta hynrei ngin hap ban shim rai da ka General Executive Committee namarba ngi don lang ïa ki paralok nonghikai na rilum Garo,” u la ong.
Haba kylli, u la ong, “na ka bynta ka bha ka miat, mano bym kwah ïa ka jingïatylli. Ha kane ka kynti hi kaba mynta ngim pat lah ban ong eiei.”
U General Secretary ka AMSSASTA Bah Wandaphi Lapang, haba bynrap halor ka jingdawa jong ka seng u la ong, lyngba ka jingïakynduh ïa u Myntri ka Sorkar Jylla u Bah Paul Lyngdoh, la ïathuh ba u Myntri ka tnat Pule Puthi u Rakkam A. Sangma u dang pynkhreh ïa ka kaiphod bad ap haduh ban da wan phai u Myntri Rangbah ba un bishar shwa ban rah ha ka jingïalang Kynhun Myntri.
