Shillong, Jymmang, 02: Kan long ka khubor kaba kmen ïa ki nongshna phlim namar shen ka Sorkar kan sa tei ar tylli ki Cinema Hall ha nongbah Shillong.
Haba pyntip ïa kane ha ka sngi Thohdieng, u Myntri ka Sorkar Jylla uba khmih ïa ka tnat Arts and Culture Bah Paul Lyngdoh u la ong, “ban pynbiang ïa ki jingdawa jong ki paidbah khamtam ban kyntiew ïa ka karkhana pynmih phlim na ka jylla, ngi ladep ïasoi ïa ka soskular ha kaba ar tylli ki Cinema Hall ha nongbah Shillong yn sa tei noh shen bad kawei ka la nang ïaid shakhmat, ïa kaba la khot kum ka Black Box kaba don ha Lariti Complex, New Shillong bad kawei pat kan long ha Library Auditorium,” u la ong.
Shuh shuh u Bah Paul u la ïathuh ba ka Sorkar ka la rai ban buh ruh kham bun ki Cinema Hall ha baroh kawei ka jylla da kaba sdnag shwa na ka Hall jong ka Department of Arts & Culture ha Jowai bad Tura hapoh une u snem bad ha kiwei kiwei ki District ruh yn sa shna kham hadien.
Haba kylli, u Bah Paul u la ong, “nga kwah ban ïasam jingtip bad phi ba ka Meghalaya ka dei tang ma ka, ka jylla kaba don ïa ka rynsan OTT kaba la kyrshan da ka Sorkar. Ka rynsan OTT ka la paw pyrthei bha mynta bad ka la ïoh ruh ïa ki nongpeit wat nabar ri. Baroh ki phlim ba la shna ha ka ktien Khasi, Pnar bad Garo la pyni. Ki jingrwai bad ki music videos la thep ha ka OTT bad kane ka dei ka sienjam ba ka Sorkar Jylla ka la ai jingkyrshan ïa ki riewdonsap ha ka tem ka put bad ka rwai ka siaw.”
U la ïathuh ba ka Sorkar ka la pyrkhat ruh ban pynmih ïa ki phlim na ka jylla. “Ynda ka sorkar ka la pyndep ïa ka cabinet draft memo ngin sa rah ban ïakren ha ka kynhun myntri,” u la ong.
U la pyntip ruh ba ïa ka State-of-the-art Museum shen yn sa plie paidbah ha State Central Library Auditorium Complex ha Shillong ha u bnai ban sa wan.
“Nga ong ba kan dei ka State of the Art namarba yn sa pyndait da ki technology ba mynta bad ka rung ka mih ha ka Museum kan ïarap ïa ki briew bad ïa ki paidbah ka Meghalaya ban ïohi ïa ka jingitynnat, ka histori bad ka jingim jong ki paidbah ha ki shnong ïa kiba yn sa buh ha ka Mesuem, ka ban sa treikam noh naduh u bnai Jylliew, mynta u snem,” u la ong.
Shuh shuh u la pyntip ba ynda kane ka projek ka la sdang ïa ka Library Auditorium yn sa pynkynriah biang sha ka jaka ba ju don ha Rilbong.
“Ynda la pynkynriah ïa ka Ingdobar Thawaiñ ka jylla la kumno kumno ha u bnai Nailur-Risaw mynta u snem, ngin sa lah ban pynkynriah ïa ka Auditorium sha Brookeside, kaba hap hapoh ka jingkhmih jong ka tnat Arts & Culture,” la pyntip u Bah Paul.
U Myntri u la pyntip ba ka jingshna ïa ka Tagore Museum ladep aiti sha ka MTDC ha ka jinglut kaba kot kumba T. 14 klur.
Shuh shuh u la pyntip ba ka Sorkar ka la ïaid shakhmat ban shimti noh ïa ka jaka kaba dei jong ka tnat Arts & Culture ha Tribal Research Institute, Mawlai bad ka jingthmu ban pynkynriah noh ïa ka ktem CRPF sha New Shillong.
“Kane kan urlong la kumno kumno ha kaba kut jong une u snem,” u la ong.
Nalor kata, ka Sorkar ka la mang pisa ruh T. 2 klur ban kyntiew kyrdan ïa ka State Central Library.
“Khnang ban pynmyntoi ïa ki briew kiba ju ieid ban pule kot, ngi la ïatreilang bad kawei ka kynhun hapoh ka projek Kali Kit Kot, ka ban long ka kali kaba don ïa ka Library kaba buh ïa ki kot ba laiphew jait,” la ïathuh u Bah Paul.
