Shillong, Jymmang, 04: Ka seng kieng atiar Hynñiewtrep National Liberation Council (HNLC) ba la shah kheiñ beañ ka la kynnoh ba ka don ka jyrsieh basap kaba shyrkhei bha ha ka ophis District Transport Officer (DTO) ha Ri Bhoi District.
Ha u kyrwoh ba la phah sha ki lad pathai khubor ha ka sngi u Blei u General Secretary jong ka HNLC u Bah Saiñkupar Nongtraw u la ong, “(Ka don) ka jingïadei kam runar bad ka jingshet kylla ïa ki tnat treikam kaba la pynïaid napoh ka ophis jong u District Transport Officer (DTO) ha Ri Bhoi, hapoh ka jingbthah jong u Ivan Kharmon. Hapoh ka samoi treikam jong u Ivan Kharmon, ka ophis DTO ha Ri Bhoi ka la kylla long ka pdeng jong ka jingbamsap, ha kaba ka jingdawa pisa, ka jingleh thok ki dei kiba la pynbeit janai bha. Kaei kaba la long mynshuwa ka jaka pynïaid paidbah mynta ka la kylla long ka mashin na ka bynta ka jingmyntoi shimet, da kaba pynkheiñ ïa ki aiñ jong ka jylla bad ïa ka jingshaniah paidbah la pyndem ban shakri ïa ki jingmyntoi pyrshah jaitbynriew bad ban pynriewspah ïa ka kynhun bamsap.”
U la kynnoh ba ha Ri Bhoi, ka jingïasuhbuit na ka ophis u DTO ha kaba ïa ki kali la wanrah nabar jylla khamtam na ka jylla Assam ha kaba la pynkylla beaiñ sha ki registration number ka Meghalaya (ML-05 ne ML-10) da kaba shu soi thok ïa ki kot ki sla bad ki jingsoi thok. Ïa kane la leh da kaba tip bha watla ka long kaba shu leh be-aiñ. La dawa na ki trai kali hapdeng T. 50,000 hajaa bad T. 1,00,000 lak na ka bynta ban leh ïa ki kam. Nalor kata, ka jingpynrung kyrteng ML-10 ka long kaba la pyndonkam bakla, namarba ki nongsiew pisa tuh ki shah ai ïa ki nombar ba la jied (kum ka ML-10 C ne M) nalor ka jingbud ryntih, kaba pynkheiñ ïa ka Moter Vehicle Act kali bad kaba pynpaw pyrthei ïa ka jingbamsap bad ka jingsngewbha ïano re ïano.”
“Da ka jingïatreilang bad uwei u non-tribal middleman uba kyrteng u Pradip bad ka kynhun jong ki dalals (agent), u Ivan u shna ïa ki kot ki sla kiba thok bad u pynsuk ïa ka jingrung tuh ki kali tuh ne kali kamai na kiwei pat ki jylla sha Meghalaya. Ki kam jong u ki pynkheiñ ïa kiba bun ki bynta jong ka Indian Penal Code, kynthup ïa ka 420 (ka jingleh thok), 468 (ka jingsoi thok), 471 (ka jingpyndonkam ïa ki kot ki sla thok), bad ka 120B (ka jingthmu ban leh thok). Man la u bnai, u Ivan u lum pisa da ki lak bad ki lak tyngka na ki nongkit mar, khamtam kito kiba khaii ïa u dewiong, u kwai (supari), ki masi, bad kiwei kiwei ki mar kiba rem dor. Ïa kine ki trok la shah ban ïaid khlem da peit bniah, da kaba ïaid lait ïa ki Weighbridge bad ïa ki kyndon ban kit palat pud, tang da kaba shu phah siew pisa,” la kynnoh u Bah Nongtraw.
Shuh shuh, u nongïalam ka HNLC u la ong ba kane kam dei tang ka kam jong uwei u briew. Ka HNLC ka la sei madan ba manla u bnai u Ivan u ju ïasam ïa ka bhah ba ïoh na kaba lum beaiñ ïa ka kynhun jong ki nongïatreilang, kynthup ïa ki katto katne ki kynhun bamsap, u SP, u OC Pakynteiñ bad katto katne ki Myntri ba ha khliehduh ha ka sorkar MDA.
“Ïa ka jingleh thok ban ïada baroh kawei ka long kaba la pynïaid da ka pisa bamsap ba la ïoh lum na ka jingjynjar jong ki briew jong ngi bad ka jingpyndonkam bakla ïa ki marpoh khyndew jong ngi,” la kynnoh shuh shuh u Bah Nongtraw.
“U OC S. Pakynteiñ u la neh la slem bha ha Ri Bhoi khlem da shah pynkynriah. Ka jingdon jong u kaba slem bad ka jingïatreilang kaba jan bad u DTO ka pynpaw shai ïa ka jingïadei kaba thmu hapdeng ki Pulit bad ki nongleh kam sniew. Ka jingbteng jong u ban shah thung kam dei namar ka jingtbit ban treikam, ka dei kaba la pynbeit. Ki jingleh jong u Ivan Kharmon bad ki nongïada jong u kim dei tang ki kam bamsap; ki dei ki jingthombor beit ïa ka ïoh ka kot, ka jinglong kyrpang bad ka jingshngaiñ jong ka jaitbynriew Hynñiewtrep. Ka jingpyndonkam bakla ïa ki tnat sorkar sorkar ban ïarap ïa ka khaii pateng be-aiñ, ban ïada ïa ki jingmyntoi jong kiwei ki jaitbynriew bad ban pynduh ïa ka jingtreikam kaba khuid ka dei ka kam jong ka jingleh be-aiñ.”
