Mawkyrwat, Lber, 11: Kawei ka jingjia kaba ishyrkhei ka la pynkyndit ia ki paitbah nongleit nongwan haba kawei ka jingkieng nar kaba heh ka la dkut kynsan ha ka por kumba 9:00 baje mynstep katba kawei ka Trok kaba don ia u number AS01 EC 8291 ka dang iaid lyngba na kane ka jingkieng.
Kane ka jingkieng ka dei kaba pyniasoh ia ka surok kaba leit sha ka shnong Mawkyrwat bad Nongshilong bad ka jaka ba kane ka jingkieng nar ka kdiah ar lyngkhot ka dei kaba la tip kum ka Wah Umchangkhar kaba hap hapoh ka South West Khasi Hills District.
Katkum ka khubor ba la iohlum la iathuh ba kane ka trok ka dei kaba kit ia ki nar rod bad kaba mih na ka shnong Nongkasen ban leit pynhap sha ka shnong Rangblang.
Ki nar rod ba la kit hapoh kane ka trok ki don kumba 20 ton eiei bad kaba sngewsih ka long shwa ba ka trok kan lait ban jam sha shiliang ha kum kane ka por ka jingkieng ka la dkut kynsan ar lyngkhot.
Ha kane ka jingjia u nongniah jong ka trok u la lait thaw na ka jingmynsaw.
Ka jingdkut noh jong kane ka jingkieng nar ka la buh jingeh haduh katta katta ia ki paidbah nongleit nongwan jong ka Eastern West Khasi Hills bad ka South West Khasi Hills.
