Shillong, Jylliew, 21: U President jong ka Meghalaya Pradesh Congress Committee u Bah Vincent H. Pala u la kam ba bun ki nongialam jong kiwei kiwei ki seng sainpyrthei ki la khroh ia u ban iakhun ia ka elekshon MP na Shillong Parliamentary Seat ka ban sa long ha u snem 2024.
Ha ka jingiakren bad ki lad pathai khubor ha ka 21 tarik u Jylliew, 2023 u Bah Vincent Pala uba long ruh u MP ba mynta jong ka Lok Sabha na 1-Shillong Lok Sabha Constituency u la ong, ba kumba u la iai neh bad ka Seng Congress naduh kaba sdang kumta ruh un iaineh bad kane ka seng sain pyrthei hynrei tang lada ka Congress ka beh hi ia u na ka party.
“Ngam kwah ban iakren shapang u Mukul bad bun ki briew kiba la pyrshang khroh ia nga hynrei ngam dei uba tatdor. Nga la sdang ia ka jingim kum u riewpaidbah bad ngam lah ban shu shah rong noh ha kano kano ka party. Ngan iaineh beit ha ka Congress bad ngan iaineh bad ka Congress tang lada ka Congress ka beh hi ia nga, kata, kan dei da kawei ka daw hynrei kam don kano kano ka daw ba ngan leit iakhun (na kiwei pat ki seng sainpyrthei),” ong u Bah Pala.
“Ym don jingartatien, bun ki nongialam jong kiwei ki seng saiñpyrthei ki ju ong ia nga balei ngam iakhun na kane ka party, nga don bun ngut ki paralok MP, ki ong wan sha ka BJP, wan sha ka NPP hynrei ngam dei uba tatdor,” bynrap u Bah Pala.“Ngan iaineh kum u briew uba shisur shidur. Ngam sngew eiei lada nga rem ne nga jop ia ka elekshon bad ngan ym pyndem noh ia la ki jong ki hok, ngam ym pyndem ia ki nongrim lajong. Ngam ym leit sha ka NPP ne ngan iakhun na kiwei pat ki party. Ngan iai neh beit bad ka Congress bad ngan iakhun (ia ka elekshon na ka Congress bad phin ai biang ka jingkyrshan ba ngan jop biang ha kane ka kynti,” ong shuh shuh u Bah Pala.
