Shillong, Jylliew, 21: Ki nongialam jong ka Meghalaya Asha Workers Union ha ka sngi Balang ka la aiti da ka jingthoh ha ka Myntri ka Koit ka Khiah jong ka Sorkar Jylla ka Dr. Ampareen Lyngdoh ban dawa ia ka Sorkar Jylla ba kan kyntiew noh ia ka jingsiew Honorarium kaba tang ar hajar shi bnai.
Ka President jong ka MAWU ka Kong Mira June Myrsing ha ka jingiakren bad ki lad pathai khubor ka la ong ba ka Union ka la dawa ruh ia ka Sorkar ban ai jingsumar ei ia ki Asha la ka long na ka MHIS lane na kano kano ka skhim ba ka Sorkar ka lah ban ai. Ha kajuh ka por ka Union ka la dawa ia ka sorkar ban thaw da ka rule kaban iada ia ki Asha na ka jingshah wengkam khlem kano kano ka daw kaba biang.
