Shillong, Rymphang, 19: Ka kynhun ki doctor kiba don hapoh ka shatri AYUSH Medical Association of Meghalaya (AMAM) ha ka Lah Sngi u Blei ki la leit ban kynduh ia ka Myntri ba khmih ia tnad ka koit ka khiah ka Dr. Mazel Ampareen Lyngdoh, ban wad jingtip halor ka jingpynslem ban thung AYUSH Doctor.
Ia kane ka kynhun jong ki Doctor la lamkhmat da u Dr. Alistar Lyngdoh uba dei u President ka Association ryngkat ka jingsynran lang ki para dkhot.
Haba kren sha ki lad pathai khubor hadien ba la dep ia kynduh ia ka Dr. Mazel Ampareen Lyngdoh u Dr. Alistar Lyngdoh u la ong katkum ka jingtip ba la ioh la pyntip ba ka jingpynslem ka dei namar ba kam don ka Service Rules jong ka tnad ka koit ka khiah jong ka Sorkar Jylla na ka bynta ki doctor AYUSH bad u la pyntip ruh ba kin sa ia kynduh biang ha ka 29 tarik mynta u bnai.
