Shillong, Iaiong, 18: U Myntri ka tnat Pule Puthi jong ka Sorkar Jylla u Rakkam A. Sangma ha ka Sngi Baar mynta ka taiew u la ong ba ka Sorkar Jylla ka dang bishar bniah ia ka jingtyrwa ban pynrung noh da ka Central Board of School Education Syllabus ha ki skul pule kiba don ha kane ka jylla Meghalaya.
Ha ka jingiakren bad ki lad pathai khubor, u Myntri ka tnat Pule Puthi u la ong “ia mynta ngi dang bishar bniah ia ka jingtyrwa ban pdiang ia ka CBSE Curriculum khnang ban pynjanai ia ka pule ka puthi jong ki khynnah skul jong ngi ha kane ka jylla.”
“Ym baroh hynrei tang ha ki katto katne ki bynta bad suki pa suki ngin sa nang jam shakhmat kumno ban wanrah ia ka pule ka puthi kaba bha na ka bynta ki khynnah skul,” u la bynrap.
Shuh shuh u la ong ba kane ka jingthmu ka long ban pynthikna ba ki khynnah skul jong kane ka jylla Meghalaya kin iaryngkat kyrdan ha ka pule ka puthi bad ki skul kiba don ha ka ri India baroh kawei.
