Ka kynhun ki sim pukni kiba la wan dem la kumba ar taïew tam ha ka shnong Lad Demthring kaba don ha West Jaintia Hills District Pukni kyndit kynsan ki la hiar thma ïa ki dukan die doh kiba don harud surok bah Amlarem-Dawki namar ba la trei shaba palat ka jingtyrsaw bym ioh jingbam.
Kine ki Pukni ki dei kiba la tip kum ki Himalayan vulture (Gyps himalayensis) bad kiba la ai jingiada da ki bor ba dei peit jong ka tnat Forest.
Kane ka dei ruh ka sien kaba ar ba kine ki Pukni kin wan dem harud surok ha ka lad ban leit sha ka shnong Demthring, ka shnong kaba jngai tang katto katne kilometre na Jowai kaba don sha shilliang ka Wah Myntdu ka dei namar ka jingdon jong ka sem shohdoh.
Ka jingdon jong kine ki Pukni ha kane ka jaka ka la khring ïa ki paidbah ban leit jngoh kai khamtam ki nongshang suwari nabar ka Jylla kiba hiar ruh na ka kali ban leit shongdur bad ringdur bad ban bsa jingbam ruh ïa kine ki Pukni.
Ha kine ki khyndiat sngi namar ka jingbiang ka bam, kine ki Pukni kim shym la tur satia sha ki dukan die doh hynrei tad ha ka 18 tarik, Iaiong, 2023 ki la tur puk ha ki dukan ban rong wat ïa ka doh ba la die ha ki dukan.
Kine ki sim Pukni ki don haduh 38 tylli bad na ka liang ka tnad Forest ka la ai ka jingïada ïa ki na ki riew shim kabu bad ha kajuh ka por ka tnat Forest ka la kyntu ïa uwei pa uwei ban ai ka jingïada ïa kine ki sim namarba ki dei ki sim kiba la jan duhjait katkum International Union for Conservation of Nature, Red List Threatened Species.
