Shillong, Naitung, 07: Ki nongialam jong ka Tour Guide Association of Meghalaya (TGAM) ha ka sngi palei ki la iakynduh ia u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ban kyntu ia ka District Council ba ka dei ban pyrrkhing ia ka jingtreikam jong ki Tour Guide Operator kiba nabar jylla ban treikam hapoh u pud u sam jong ka Council.
Ha ka jingkren bad ki lad pathai khubor, u President jong ka TGAM, Bah Ialamphang Lyngdoh u la ong ba kane ka jingpynsngew sha ki tyndong skhor jong ka Council ka long namar ka jingsdang ban jyllei jong ki Tour Operator kiba wan nabar jylla ban treikam hapoh u pud u sam ka Council khlem da kynjoh ktien sha ki Tour Operator trai ri trai muluk kiba im kamai jakpoh na kane ka kam.
Ka seng ka la shem ba kane ka jingtreikam jong ki Tour Operator kiba nabar jylla ka la ktah bha ia ki samla trai ri trai muluk kiba sengkam lajong khamtam ha kaba iadei bad ka jingkyntiew ia ki kam jngohkai pyrthei hapoh ka jylla.
