Shillong, Nailur, 18: Ka jingkhladnoh jong i khunlung ba dang shu kha jong kawei ka longkmie kaba la ngat ha ka jingdheng kali da ki bun kynta ha ka shnong Pamphyrnai ha ka 17 tarik, Nailur, 2023 na ka jingpynlong ia ka jingiakob khwai ka la pynlong ia ka Hynniewtrep Youth Council North, West Khasi Hills District bad ia ka Ri Khasi Sepngi Federation ba kin pynrem jur ia ki paidbah bad ia ki rawon ki bym don shuh ka mynsiem sngewsynei parabriew.
Kine ki ar tylli ki sengbhalang ki la dawa ia ki trai kiba pyniaid ia ka jingiakop khwai dohkha ba ki dei ban siew ia ka bailutksan sha ka longing kaba la mad ia ka jingjia basngewsih bad ki la pynrem jur ruh ia ki bor synshar district ba ha kano ka rukom bad ha kano ka kyndon ki ai jingbit ia ki nongpyniathong khwai dohkha ha kaba wat ia ka surok National Highway-44E ha kane ka sngi la iohi kumba ka dei ka Parking lot jongno re jongno.
Shuh shuh kine ki ar tylli ki seng ki la pynrem jur ruh ia ka jingiadon bynta lang jong u Pulit ha ka Uniform ha ka por ba don ka jingiakhalai nusib bad ki la dawa ruh na ki bor synsahr district ban khang shwa ia ka jingiakop khwai dohkha hapoh ka District.
Kum ban shu pynkynmaw, ka jingïakop khwai dohkha ha pung Pamphyrnai West Khasi Hills ha ka 16 tarik, Nailur, 2023, ka la wanrah pynban ïa ka khubor ba sngewsih, ha kaba tang na ka daw ka jingsahkut jong ka kali bad ka jingbym poi sha ka jaka sumar ha ka por ba biang, kawei ka longkmie ka la kha khun hapoh ka kali bad tang hadien katto katne por i khunlung i la khlad noh na kane ka sla pyrthei.
Kane ka la jia ha ka sngi Saitjaiñ jong ka taiew baladep ha kaba ki rawon na kylleng ki jaka ki la tuid sha ka jaka ïakop khwai ha Pamphyrnai. Ka thymmei khubor ba la ioh lum ka la iathuh, hadien ba la pynbna ïa ka tiket khalai nusib bad ioh kali ha ka por 2:00 baje nohphai sgi, ka shilynter jong ka surokbah National Highway kaba don harud jong ka pung ha Pamphyrnai, ka la shlei da ki paidbah bad ki rawon kiba la mih sha surok bad kane ka la wanrah ïa ka jingdheng kali kaba la neh da ki bun bun kynta haduh da kem iong rein.
Ka jingsahkut ki kali kiba ïaid lyngba kane ka surok ka la pynbitar ruh ia ki nongleit nongwan kiba la sahkut da ki bun kynta hapdeng surok. La iathuh ruh ba ka jingdheng kali ka dei ruh namar ka jingshlei da ki kali ha baroh arliang ka surok. Kumta ki kali kiba mih bad leit sha Nongstoiñ ki la sahkut lut. Kine ki kali kim dei tang jong ki riew shimet bad ki kali kamai, hynrei wat ki kali Pulit, ki kali jong ki ophisar sorkar bad khamtam ki kali kit nongpang ruh ki la ngat ha kane ka dheng kali.
